АҞӘА, рашәара 8 – Sputnik. Аԥсны жәлар рартист Нодар Ҷанба Аԥсуа ҳәынҭқарратә драматә театр адиректор хадас дҟаҵоуп Аԥсны Ахада Иусԥҟа инақәыршәаны ҳәа аанацҳауеит Аԥсны Ахада иофициалт-саит.
"Аԥсуа театр ҳкультура ахәышҭаарақәа инарылукааша акоуп. Атеатр аҿы аҭыԥ зманы иҟоу аҩныҵҟатә ҳәоуеиқәымшәара иара ахьӡ-аԥша иацнаҵоит ҳәа узҳәом. Аҭагылазаашьа еицәамхозар, еиӷьхом. Изныкымкәа иҟаҳҵаша ҳалацәажәахьан, аха аиныршәара ҳзалмыршеит", — иҳәеит иара.
Рауль Ҳаџьымба иазгәеиҭеит атеатр аҿы аизыҟазаашьақәа рҽырыԥсахыр шакәу.
Аԥсуа драмтә театр актиор, Аԥсны зҽаԥсазтәыз артист Роман Сабуа иҳәеит аколлектив зегьы еицҿакрыла ирыдгало акандидатура иақәшаҳаҭуп ҳәа шузымҳәо.
Рауль Ҳаџьымба иазгәеиҭеит аколлектив ирымаз рыҩныҵҟатә еимакы уажәраанӡа ишырзымыӡбац.
"Иҟоуп ҩ-ганк. Урҭгьы егьырҭгьы актиорцәа, режиссиорцәа ссирқәоуп, аха дара ирылымшеит иаку командакны рыҟалара. Убри азы акомиссиа аԥҵан. Акраамҭатәи аилацәажәара ашьҭахь, акомиссиа абжьагажәала, атеатр адиректор хадас еицырдыруа ауаҩ Нодар Ҷанба иҟаҵара азҵаара аӡбыртә иаабеит", — иҳәеит иара.
Нодар Ҷанба иҳәеит атеатр аҩныҵҟатә ҭагылазаашьа бзианы ишидыруа, илшо зегь шыҟаиҵало аколлектив ҭынч аҟазара ахьӡала аус руртә рыҟалара иҽшазишәо.
Амузыкант, адирижер, акомпозитор, Аԥсны жәлар рартист Нодар Ҷанба диит 1955 шықәса хәажәкыра 10 рзы Гәдоуҭа ақалақь аҟны.
1985 – 1986 шш. – Аҳәынҭқарратә хортә копелла адирижерс дыҟан.
1992 –1993 шш. – Аԥсны Акультура аминистр.
