АҞӘА, рашәара 15 – Sputnik, Бадри Есиава. Амҩаҿ аилагарақәа аазырԥшуа ҳаамҭазтәи атехнологиақәеи автоматизациеи иалдыршоит амашьына аԥсҟы зку ирыхәҭоу рақәыршәара урҭ амҩатә ныҟәара аԥҟаррақәа еиларгазар — ҳәа иҳәеит аԥшьаша, рашәара 14 рзы "АРСМИРА" имҩаԥысыз апресс-конференциаҿы Аԥсны Аҳәынҭавтоинспекциа аиҳабы Баҭал Агрба.
"Абри апроблема аӡбра алдыршоит Ԥсоу-Егры еимаздо ареспубликатә мҩаду аҿы аилагарақәа ҭазыҩуа автоматизациатә хархәагақәа. Абри аан Аҳәынҭавтоинспекциа аусзуҩцәа абри аус аҟынтәи рхы иақәиҭтәхоит. Уи адагьы автофиксациа ауаҩытәыҩсатә фактории акоррупциатә ҭагылазаашьеи алнакуеит", — иҳәеит иара.
Агрба ажурналистцәа идирдырит амҩатә машәырқәа рыстатистика. Иара иажәақәа рыла, аҵыхәтәантәи ашықәс азы иҭахеит 1437-ҩык, аахақәа роуит 5537-ҩык.
Асеиԥш амашәырқәа рхыԥхьаӡара аҳаракра арныҟәцаҩцәа адисциплина иахьықәымныҟәои амҩатә ԥҟаррақәа хырҩа ахьрырҭои ауп иҳәоит Агрба.
"Зегьы ирдыруеит ҳамҩақәа рҿы ишыҟам амҩатә ԥҟаррақәа еилазымго. Џьоукы-џьоукы урҭ иааиԥмырҟьаӡакәа еиларгоит ҳәа уҳәаргьы ауеит. Автошколақәа рҿы аҵара амҩаԥысшьеи ахаҭабзиареи ртәы аҳәара зынӡа игәаӷьыуацәоуп. 2018 шықәса рзы уа аҵара зҵо 1020-ҩык рҟынтәи аԥышәара аҭира зылшаз 356-ҩык роуп", — иҳәеит Агрба.
Аԥсны Аҳәынҭавтоинспекциа акадрқәа рыла акыр имаџьаноуп, аус зуагьы русура ахаҭабзиара анырра анаҭоит ирымоу адыррақәа.
Аԥсны Аҳәынҭавтоинспекциа акадрқәа русура аиӷьтәра иацхраауеит рулафахәы ашьҭыхра, аха иахьазы уи акыр илаҟәуп иҳәеит иара.
2017 шықәса абҵарамза аахыс Аԥсны ААИ аилазаара русура арежим ҷыдахь ииагоуп.
" 2018 шықәса ажьырныҳәамза инаркны лаҵарамзанӡа иаарԥшуп 16 588 еилагара. Арахь иаҵанакуеит ижәны аԥсҟы акразы аилагарақәа 1050, амашьына арццакразы – 11 790. Иара абри аамҭа иаҵанакуа 2017 шықәса рзы иаарԥшын 13 642 цәгьоура", — ҳәа астатистика далацәажәоит Агрба.
