Аԥсны аԥыза-министр Ҭырқәтәылаҟа иныҟәара аихшьаалақәа ҟаиҵеит

© Sputnik / Томас ТхайцукЗдание кабинета министров
Здание кабинета министров - Sputnik Аҧсны
Анапаҵаҩра
Аԥсны аԥыза-министр Валери Бганба Ҭырқәтәыла даҭаан дыҟан жәабран 4 - 6 рзы.

АҞӘА, жәабран 7 – Sputnik, Бадраҟ Аҩӡба. Аԥыза-министр Валери Бганба Ҭырқәтәылаҟа иныҟәара аихшьаалақәа ҟаиҵеит аԥшьаша, жәабран 7 рзы.  

"Аиааира  25-шықәса ахыҵра аназгәаҳҭоз Ҭырқәтәылатәи ҳдиаспора ахаҭарнакцәа Аԥсны ахада ааԥхьара ирҭеит ақалақь Адаԥазар акультуратә центр ашьаҭакра ихы алаирхәырц. Атәыла ахада ари аус сара снапы ианиҵеит", - иҳәеит иара.

Аԥхьа аԥыза-министр Сҭамԥылҟа днеиит. Уа Аԥсны аиҳабыра ирԥыларц ирзыԥшын ҩышәҩык рҟынӡа адиаспора рхаҭарнакцәа, Сҭампылтәи абыргцәа рхеилак ахаҭарнакцәа, Ҭырқәтәыла иҟоу аԥсуа культуратә центрқәа рхаҭарнакцәа, Ҭырқәтәыла аҵара зҵо аԥсуа студентцәа.

Арда Ашуба - Sputnik Аҧсны
Арда Ашәба: аҭҵаарадырратә ҩаӡара змоу арҵаҩцәа роуп Дузџьатәи ауниверситет ахь ишьҭхо

"Сара иааркьаҿны салацәажәеит Аԥсны иҟоу аҭагылазаашьа, ҳагәҭакқәа. Азҵаара рацәа сықәрыԥсеит. Ҷыдала иазааҭгылан ирҳәон Ҭырқәтәылантәи Аԥсныҟа раара ауадаҩрақәа шацу", - иҳәеит Бганба.

Авиза мацара 220 доллар иаԥсоуп. Сҭампылынтәи Шәачанӡа амҩаԥсагьы акыр иҳаракуп ҳәа иҳәеит иара.

"Зны-зынла Сҭамԥылынтәи Москваҟа унеины уантәи Шәачаҟа уаара еиҳа имариоуп. Аԥсуа паспорт умазаргьы (усҟан авиза аҭахӡам) дара хымԥада Урыстәыла амиграциатә маҵзураҿы ашәҟәы рыҽҭаргалароуп. Аха шамахамзар аҳаирпланқәа ашьыжь асааҭ 3-4 рзоуп иантәо. Абри аамҭазы, ҳәарада, русқәа рзыҟаҵом", - иҳәеит аԥыза-министр.

Абасеиԥш иҟоу ауадаҩрақәа ҳџьынџьуаа Аԥсныҟа раара архьанҭоит.

"Ҳәарада ҳара арҭ азҵаарақәа урыстәылатәи ҳколлегацәа ирзеиҭаҳҳәоит, рыӡбра ахьынӡауа иалҳаршоит", - иҳәеит Валери Бганба.

Аҩбатәи амш азы аԥыза-министр Адаԥазарҟа днеит. Уа инхоит 80 нызқьҩык рҟынӡа аԥсуаа. Ара идыргылараны иҟоуп аԥсуа культуратә центр. Аԥыза-министр ихы алаирхәит Ацентр ахыбра ҿыц ашьаҭакра ацеремониа.

"Ацентр аҿы иаԥҵахоит аҭагылазаашьақәа, изҭаху дарбанызаалак Аԥсны иазку аинформациа иоурц. Иаԥҵахоит амузеи, еиҿкаахоит  еиуеиԥшым акружокқәа, аԥсуа бызшәа аҵара ҭыԥқәа. Еиҿкаахоит амилаҭтә шәаҳәареи акәашареи рыкружокқәа", - ҳәа еиҭеиҳәоит иара.

Акультуратә центр аргылара хыркәшахоит сынтәа, Аиааиреи ахьыԥшымреи рымш аҽны, цәыббра 30 рзы.

Аныҟәараан ирылацәажәан аԥсадгьыл ахь ахынҳәра иадҳәалоу азҵаарақәа иҳәеит аԥыза-министр.

"Адиаспора атәылауҩшәҟәқәа роурагь иалацәажәеит. Ацара-аара мариахар зыԥсадгьыл збар зҭаху рхыԥхьаӡара акыр еиҳахоит", - иҳәеит иара.

Зџьынџь ԥсадгьыл ахь зыбзиабара аатуа ауаа ара аанхарагьы рҭаххоит.

Ажәабжьқәа зегьы
0