АҞӘА, хәажәкыра 20 – Sputnik, Бадри Есиава. Уаанӡа актәи аԥхьарала Апарламент аҿы ирыдыркылаз асаркьа арлашьцара аԥҟарақәа хәажәкыра 20 рзы аҩбатәи аԥхьарала мап ҳәа ахырҳәааит. Абри атәы аҭыԥ аҿынтәи иааицҳауеит Sputnik акорреспондент.
Азакәан апроект адепутатцәа ирыдигалеит адепутат Валери Агрба. Иара иажәақәа рыла актәи аԥхьарала ирыдыркылаз аԥҟарақәа Аԥсны аҩныҵҟатәи аусқәа рминистрра азинмчра змоу аусбарҭақәа адкылара рабжьдмыргеит.
Азинхьчаратә органқәа асеиԥш рыӡбара ҵаҵӷәдыркит автомашьынақәа рсаркьақәа рырлашьцара амҩабара ладырҟәуеит, аиҳаракгьы амшцәгьаани уахынлеи ҳәа.
Азакәан апроект аԥшьгаҩ Алмас Џьапуа арҭ аҵаҵӷәқәа азымхоны ибеит, иагьазгәеиҭеит ариашарақәа аԥхьатәи асаркьақәа рырлашьцара азыԥхьагәарҭомызт ҳәа.
Автомашьынақәа рхатәтәыҩцәеи ААИ аусзуҩцәеи еицырнаалашаз аҭагылазаашьаз ажәалагала ҟаиҵеит Жәлар Реизара адепутат Баҭал Табаӷәуа. Иара игәаанагарала азакәан арҽеирақәа ирзыманшәалахар алшоит 50 иреиҳам арлашьцаркра.
Ари ажәалагала ирыдгалаз азакәан апроект аҿы иахьарбамыз азы арегламент инақәыршәаны уи азы абжьыҭира ҟаломызт.
Иахьазы аус зуа аԥҟарақәа Жәлар Реизараҿы ирыдкылан 2012 шықәса рзы.
