АҞӘА, цәыббра 3 – Sputnik. Нанҳәа 1 аахыс миллионҩык инарзынаԥшуа аурыс-аԥсуа ҳәаа иахысхьеит, абри атәы аанацҳауеит Шәачатәи аҳазалхратә усбарҭа апресс-маҵзура.
"Аҳәаа рахысраан аҳазалхратә хылаԥшра иҵгоуп 200 000 транспорттә хархәага. Аԥсни Урыстәылеи рҳәаа аадыртижьҭеи иара иахысит миллионҩык рҟынӡа ауааԥсыра", - аҳәоит адырраҭараҿы.
Аушьҭырҭатә ҭыԥ "Адлер" аҿы атранспорттәи апассаџьыртәи трафик еиҳа-еиҳа ирызҳауеит ҳәа азгәарҭоит апресс-маҵзураҿы.
"Аҳазалхратә ҭыԥ аҿы, иара алшарақәа раасҭа ҩынтәны еиҳаны имҩаԥысуеит атранспорттәи апассаџьыртәи трафик. Есыҽны аушьҭырҭатә ҭыԥ "Адлер" ала аҳәаа иахысуеит 40 нызқьҩык инарзынаԥшуа ауааԥсыреи 7 000 рҟынӡа транспорт хархәагеи", - рҳәеит Шәачатәи аҳазалхырҭаҿы.
АҬ "Адлер" ганрацәалатәи ацәаҳәақәа роушьҭратә лшара уахыки-ҽнаки рыҩныҵҟа иартәоит – 1,5 нызқь транспорт хархәага.
Уаанӡатәи адыррақәа рыла аԥхьатәи амчыбжь иалагӡаны аҳәаа иахысит 200 нызқьҩык. Дара реиҳара Аԥсныҟа ԥсшьара иааз роуп.
Ииасыз ашықәс азы акурортқәеи атуризми рзы аминистр Авҭандил Гарцкиа иажәақәа рыла ареспубликаҿ рыԥсы ршьеит миллионки 50 нызқьҩык.
