АҞӘА, абҵара 6 - Sputnik. Очамчыра араион Аҩныҵҟатәи аусқәа рыҟәша аусҭҵааратә гәыԥ ашьаус хацнаркит автомашьына "Мерседес" аԥсҟы зкыз иганахь ала ҳәа аанацҳауеит Аԥсны ААР асаит.
Амҩатә машәыр ҟалеит ареспубликатә трасса Ԥсоу-Егры аҿы абҵара 5 ахәылбыҽха, асааҭ 18.45 рзы.
"Гал ақалақь аганахьынтә Аҟәаҟа зхы хаз автомашьына Mercedes-Benz аԥсҟы зкыз Қаџьаиа Руслан Заур-иԥа, 1986 шықәса рзы ииз, амҩаду 141-тәи акилометр аҿы иаԥхьаҟатәи амҩатә цәаҳәа данылеит, иаауаз автомашьына ВАЗ-2107 дасит", - аҳәоит аусбарҭа аацҳамҭаҿы.
ВАЗ-2107 аԥсҟы зкыз Г. В. Сангәлиа, 1957 шықәса рзы иизи ипассаџьырцәа хҩыки –И. Ш Чиковани - 1971 шықәса рзы ииз, Р. М. Бигәаа - 1974 шықәса рзы ииз, Н. И. Сангәлиа - 1952 шықәса рзы ииз, зегьы Очамчыра араион Гәыԥ ақыҭа ауааԥсыра, рыԥсҭазаарақәа ирылҵит.
Қаџьаиа амедицинатә усҳәарҭахь днаган, ишьақәыргылан арыжәтә ыжәны дшыҟаз.
Очамчыра араион Аҩныҵҟатәи аусқәа рыҟәша аусҭҵааратә гәыԥ ашьаус хацнаркит автомашьына "Мерседес" аԥсҟы зкыз Руслан Қаџьаиа иганахь ала Аԥсны АЗ ахәҭаҷ 263, ахә. 6 иақәшәо ацәгьоуразы.
Уажәазы Қаџьаиа даанкылоуп.
