АҞӘА, рашәара 29 - Sputnik. Краснодартәи атәылаҿацә алалараан алаҵаҟаҵареи иҵоурам ПЦР-тести рымазаара аҭахны иҟам ҳәа аҳәоит Урыстәыла Атуроператорцәа рассоциациа.
"Краснодартәи атәылаҿацә аҟны зыуацәа рахь, командировка ицо ргәы сырҭынчыр сҭахуп. Атәылаҿацә агубернатор иқәҵара N369 аҟны иаҳәоит алаҵаҟаҵареи иҵоурам ПЦР-тест рымазаареи аҭахны иззыҟоу аотельқәа, асасааирҭа-маҷқәа, асанаториқәа, апансионатқәа, ахостелқәа уҳәа рҟны иаангылақәо роуп", - ҳәа аҳәоит адырраҭараҿы.
Абас ала, ақәҵара инақәыршәаны арегион автотранспорт ала иалало рдокументқәа иразҵаауам рыстатус азы, иара убас аҳаиртә баӷәазаҿи аихамҩатә станциаҿи антиковидтә статус иазҵаауам.
Аԥсныҟатәи атрансфер акәзар, Шәача инеиуа проблема роуам, ареспубликаҿ акәзаргьы урыстәылатәи атуристцәа рганахь ала ԥкыра азгәаҭам.
"Уажәазы ԥкырак ыҟам, Аԥсны аҵакыраҿгьы ПЦР-тестқәа ма аҽа ршаҳаҭгақәак ралагалара азыԥхьагәаҭам", - ҳәа "Вестник АТОР" иазеиҭарҳәеит Аԥсны атуризм аминистрраҿы.
Рашәарамзазы Ҟәбина аепидемиологиатә ҭагылазаашьа уадаҩхо иалагеит акоронавирус иаиуз алаҵәара инадҳәаланы. Арегион амчрақәа атәылауаа хаз игоу ркатегориақәак хымԥадатәи алаҵаҟаҵара иаҵадыркит, идырӷәӷәеит атуристцәа аԥсшьараз раангыларҭақәа рҿы аԥҟарақәа.
