АҞӘА, ԥхынгәы 21 – Sputnik. Сынтәатәи аԥхынтәи аамҭа 2019 шықәсазтәи арбагақәа ираԥнагахьеит ҳәа арадио Sputnik иазеиҭеиҳәеит Аԥсны атуризм аминистр ихаҭыԥуаҩ Асҭамур Барцыц.
"Ԥхынгәы 19, 2019 шықәсазы Афон ҿыцтәи аҳаԥы иаҭаахьан 105 274-ҩык аԥсшьаҩцәа, сынтәа – 210 952, 2019 шықәса аҩныҵҟа Риҵатәи амилаҭтә парк иаҭааит 385 000-ҩык, 2021 шықәса ԥхынгәы 1-нӡа– 297 000-ҩык. Аиҿырԥшра иунарбоит иҟоу аивыгарақәа", - иҳәоит иара.
Барцыц иажәақәа рыла атәылаҿ аԥсшьаҩцәа ахьрыдыркыло аҭыԥқәа зегьы ҭәуп. Уаанӡеиԥш аԥхьа идырҭәуеит Гагра араион, анаҩс – Аҟәа, Афон ҿыц, Гәдоуҭа. Ирацәоуп ауаа ахатә секторқәа рҿы, Очамчыра араион Кындыӷ апансионатқәа рҿы.
Асеиԥш Аԥснытәи ахырхарҭа аҭаххара мзызны иамоу апандемиа аамҭаан аҳәаанырцәуаа рзы тәылақәак иаларгалаз аԥкрақәеи аҳәаақәа раркреи роуп.
Барцыц иҳәеит иара убасгьы Аԥсныҟа ауаа адзыԥхьало иара асасдкылареи, ақьабзқәеи, акультуреи роуп ҳәа.
"Аԥсшьаҩцәа рыдкылара ахаҭабзиара ҳарактәуп. Ахәи-ахаҭабзиареи еибакапануа иҟазароуп. Ҽаангьы арахь аара рҭаххо иҟазароуп. Иазгәаҭатәуп есышықәса ҳара ҳалызхуа ауаагьы шыҟоу", - иҳәеит иара.
Аԥсны бжьаратәлатәи ашықәстә ҭаара миллионҩык рҟынӡа инаӡоит. Еиҳа-еиҳа ирацәаҩхоит мышкы ҳәа екскурсиа ҳасабла атәыла иаҭаауа рхыԥхьаӡарагьы.
Астатистика ала туристк Аԥсны 7-8 мшы ихигоит. Ҳәарада акыр еиӷьхон 12-14 иреиҵамкәа рыԥсшьарамш ара ирхыргозар. Аха уи азы аномертә фонд иацҵатәуп, аусура иалагароуп аҽыхәышәтәрагьы ахьрылшаша асанатор-курорттә обиектқәа.
Аминистр ихаҭыԥуаҩ игәаанагарала асезон жьҭаарамзанӡа инаӡар алшоит.
Мрагыларатәи Аԥсны ахәҭаҿы акәзар атуристцәа рацәаҩуп узҳәом.
Барцыц иазгәеиҭеит аминистрреи атәыла асанитар-епидемиологиатә маҵзуреи аотельқәа шгәарҭо асанитартә нормақәа рықәныҟәашьазы.
Иара иҳәеит Аԥсны амедусзуҩцәа рабыжьгарақәа ишрықәныҟәо аԥсшьаҩцәеи аперсонали коронавирустә инфекциа рацәыхьчаразы.
Барцыц иҳәеит асанитар-епедимиологиатә маҵзура абжьгарала аотель аҿы иҟазароуп ачымазараҿкы здырбало хаз иалкаарҭа аҭыԥ. Аусзуҩцәа иаразнак аҳақьымцәа ирыԥхьароуп.
Аԥсни Урыстәылеи агәабзиарахьчаразы рминистррақәа реиқәшаҳаҭрала ишьақәыргылоуп аԥсшьаҩцәа рҟынтәи COVID-19 зыдбало апациентцәа Урыстәыла аҵакырахь риагара.
