"Урыстәыла иреиҳау аҵараиурҭақәа рахь аҳәынҭқарратә ҿаҵатәы инақәыршәаны аҿар рышьҭуеит, аха Москватәи алитературатә институт ахь алимитқәа ыҟаӡам. Ари азҵаара анықәҳаргыла Урыстәыла ашәҟәыҩҩцәа реидгыла ахантәаҩы дақәшаҳаҭхеит уи даара иаҭаху усны ишыҟоу. Ажәакала, алитераторцәа ҿарацәа рааӡаразы иаҳхаҵгыларц аицәажәара ыҟоуп", - иҳәеит Аԥҳазоу.
Аԥсны ашәҟәыҩҩцәа реидгыла ахантәаҩы убасгьы дырзааҭгылеит амилаҭтә литература аӡыргара аус азы хәарҭаны иибо аурыс шәҟәыҩҩцәеи дареи излацәажәаз азҵаарақәа. Вахтанг Аԥҳазоу иажәақәа рыла, аурыс литераторцәеи аԥсуа шәҟәыҩҩцәеи русеицура иабзоурахар алшоит аҩымҭақәа егьырҭ абызшәақәа рахь реиҭагара, уи иӡырнагон амилаҭтә литература, акультура.
Урыстәыла ашәҟәыҩҩцәа реидгыла ахантәаҩы Николаи Иванов напхгара зиҭоз аделегациа Аԥсны иҟан жәабран 25 рзы. Дара ҳҳәынҭқаррахь раара хықәкыс иаман Аԥсныи Урыстәылеи рышәҟәыҩҩцәа реимадарақәа рырӷәӷәара. Аделегациа иалаз идикылеит Аԥсны аҳәынҭқарра ахада Рауль Ҳаџьымба.
Шәазыӡырҩла арадио Sputnik Аԥсны аефир.
