"Ҳџьынџьуаа аԥсшәа дырҵаразы акурсқәа мҩаԥылгалоит Аида Векәуа. Лара ААУ даушьҭымҭәоуп, уажәы адиссертациатә усумҭа ахьчара лҽазыҟалҵоит, иара азкуп атәым бызшәақәа дырҵара аметодика. Акурсқәа шхацыркхаз атәы асоциалтә даҟьақәа рҿы адырра ҟаҳҵеит, раԥхьатәи аурок аҿы иҟан 11-ҩык. Акурсқәа еизнагаз зегьы даара иргәаԥхеит. Аурокқәа мчыбжьык ахь знык, ҩ-сааҭк ицалоит, ус есымчыбжьа иазгәаҭан иҳамоуп. Акурсқәа мҩаԥыслоит Санкт-Петербург иҟоу Амилаҭқәа рыҩны аҿы", - ҳәа еиҭеиҳәеит Рекәаа.
Санкт-Петербург иаарту Адунеизегьтәи аԥсуа-абаза конгресс ахаҭарнакра анапхгаҩы иажәақәа рыла, акурсқәа иаднаԥхьалеит 17 шықәса инаркны 35 шықәса рҟынӡа зхыҵуа. Иара иазгәеиҭеит аконгресс аҟәшақәа зегьы инарыгӡо аусура ахықәкы - аԥсуа-абаза бызшәа аиқәырхыра - аринахысгьы ишацҵахо.
Инеиҵыху аиҿцәажәара шазыӡырҩы арадио Sputnik Аԥсны аефир аҿы.
