АҞӘА, ажьырныҳәа 31– Sputnik, Амра Амҷԥҳа. Аԥснытәи акаратистцәа қәыԥшцәа фҩык аиндаҭлараҿы актәи аҭыԥқәа ааныркылеит, аҽа хҩык араӡны медалқәа ранашьахеит. Абри атәы Sputnik акорреспондент илзеиҭеиҳәеит Аԥсны косике карате Афедерациа апрезидент Демис Адлеиба.
Иара иажәақәа рыла атурнир иалахәын Урыстәыла аладатәи арегионқәа, Краснодартәи атәылаҿацә, Ростов ақалақьи Ростовтәи аобласти, ааԥхьара рыҭан Аԥсни Донецки рыспортсменцәа.
Аԥсны ахьӡала иқәгылаз ҩеижәаҩык аспортсменцәа рҟынтәи жәҩык аԥыжәаратә ҭыԥқәа ааныркылеит.
"Актәи аҭыԥқәа ааныркылеит аиҳәшьцәа Сариеи Мариеи Хәпориаа, аишьцәа Ерики Артури Ходжоианаа, Кирилл Пачкориа", — ҳәа еиҭеиҳәоит Демис Адлеиба.
Араӡны медалқәа ранашьахеит Самир Хәарцкиа, Дамир Лашәриа, Софиа Аҩӡба.
Демис Адлеиба еиҭеиҳәеит капанрак иаҵанакуа агәыԥ аҟны хҩык ҳаспортсменцәа аиааира шыргаз.
"Иазгәасҭар сҭахуп, 8-9 шықәса зхыҵуаз аӡӷабцәа реисараан афинал аҟны ҳаспортсменкацәа шеиқәшәаз. Актәи аҭыԥ аанылкылеит Хупориаԥҳа, аҩбатәи – Аҩӡыԥҳа, ахԥатәи аҭыԥ аанылкылеит шәачатәи аспортсменка, аха лара милаҭла даԥсыуоуп. Апиедистал зегьы аԥсуаа иааныркылеит", — иҳәеит Адлеиба дахыҽхәо.
Адлеиба аиндаҭлараҿы аԥыжәара ззымгаз дрылацәажәо иҳәеит урҭ косики карате нап аларкыижьҭеи аамҭа рацәаны ишымцац, рԥышәа шмаҷу. Ус шакәугьы угәы рыладухартә рхы аадырԥшит иҳәеит азыҟаҵаҩ.
"Нестор Кацәба жә-шықәса роуп ихыҵуа, хымз роуп иҽазыҟаиҵоижьҭагьы иҵуа. Дзацлабуаз аҷкәын иара иаасҭа аԥышәа иман, акыр дыӷәӷәан. Ус шакәызгьы реисараан баллқәак роуп игхаз иаԥигарц. Иазгәасҭар сҭахуп Нарҭ Арсалиеи Дмитри Адлеибеи. Ишьахәны рхы аадырԥшит", — иҳәеит иара.
Косики карате Афедерациа шьаҭаркын 2012 шықәса рзы. Асекциақәа рҿы рҽазыҟарҵоит 50-ҩык инарзынаԥшуа аҿар. Аҽазыҟаҵарақәа мҩаԥыргоит Аҟәатәи актәи абжьаратә школ ахыбраҿи иашҭхәатәи ашкол ахыбраҿи. Аҟәа азыҟаҵарақәа мҩаԥигоит Демис Адлеиба, Иашҭхәа — Татиана Романова.
Адлеиба еиҭеиҳәеит ааҩык аспортсменцәа жәабран 17 рзы Москва имҩаԥысраны иҟоу Урыстәылазегьтәи косики карате атурнир ишалахәхо, нас, лаҵарамзазы Барнаулҟа, Азиа Ахраҿаз аиндаҭларахь амҩа ишықәло ртәы.
"Апланқәа рацәаны иҳамоуп. Ихадароу иааирала ахынҳәроуп", — иҳәеит Аԥсны косике карате Афедерациа апрезидент Демис Адлеиба.
Шәача ақалақь иаарту ахраҿаз аиндаҭлара иалахәын 250-ҩык рҟынӡа аспортсменцәа. Аиндаҭлара мҩаԥысуан ажьырныҳәа 26-28 рзы.
