АҞӘА, рашәара 11– Sputnik. Амҵәышәымпыл азы аветеранцәа Европатәи рчемпионат мҩаԥысраны иҟоуп Хорватиа. Иара иалахәхоит 35 — 65 шықәса зхыҵуа аспортсменцәа. Ачемпионат иалахәхоит Аԥснытәи аспортсменцәагьы иҳәеит арадио Sputnik аинтервиу азҭаз акоманда акапитан Беслан Шларба.
"Атурнир аиҿкааҩцәа ааԥхьара ҳарҭеит аха аиааира аагар ҳгимн ҳзарҳәом. Уи ацымхәрас аолимпиатә гимн аҳәоит. Асеиԥш аӡбра ҳадаҳкылеит избанзар ҳалахәра апроблемақәа рацәаны иацын", — иҳәеит иара.
Аспортсменцәа аҽазыҟаҵарақәа ирҿуп иҳәеит акоманда акапитан.
"Ҳара есыҽны аҽазыҟаҵарақәа мҩаԥаагоит. Иаарласны Москваҟа ҳԥырраны ҳаҟоуп. Рашәара 14-15 рзы Хорватиаҟа ҳцоит", — иҳәеит Шларба.
Гәыԥк аҿы аԥснытәи акоманда иацыхәмарраны иҟоуп Украинатәи аспортсменцәа.
Аԥснытәи акоманда раԥхьатәи ахәмарра мҩаԥысуеит рашәара 17 рзы.
Беслан Шларба иазгәеиҭеит аԥснытәи акомандаҿ ишыхәмаруа аԥышәа змоу аспортсменцәа.
Амҵәышәымпыл азы аветеранцәа Европатәи рчемпионат мҩаԥысраны иҟоуп Хорватиа. Иара иалахәхоит 35 — 65 шықәса зхыҵуа аспортсменцәа. Ачемпионат ахь инаԥхьоуп Аԥснытәи аспортсменцәагьы.
