Аҟамақәа кны акәашареи, адауласыҩцәеи: Аҟәа иазгәарҭеит зхатәгәаԥхарала еибашьуаз рымш

Анапаҵаҩра
Ҟабарда-Балкариатәи Академиатә ансамбль "Кабардинкеи" Аԥсны жәлар рыкәашара Аҳәынҭқарратә ансамбль "Кавкази" Аҟәа еицықәгылеит нанҳәа 15, зхатәгәаԥхарала еибашьуаз рымш азгәаҭараан.

Аколлективқәа инарыгӡеит амилаҭқәа рыҩба рыкәашарақәа. Ахәаԥшцәа гәацԥыҳәарыла, напеинҟьарыла ирыдыркылеит еицырдыруа аколлективқәа рықәгылара.

Ахәаԥшыҩцәа хнахит Азамаҭ Алакаев аҟамақәа кны икәашареи, адауласыҩцәа рыхәмарреи.

Еизаз рҿаԥхьа дықәгылеит Аԥсны Ахада ихаҭыԥуаҩ Витали Габниа. Иара иналкааны иазгәеиҭеит Аԥсны жәлар Рџьынџьтәылатә еибашьраан хатәгәаԥхарала зыҩнқәа, зҭаацәа, зҭынч ԥсҭазаара ааныжьны цхыраара иаҳзааз ауаа рлагала ду атәы.

1992-1993 шықәсазтәи Аџьынџьтәылатә еибашьра иалахәын 2 000-ҩык инареиҳаны хатәгәаԥхарала еибашьуаз. Урҭ рҟынтәи 51-ҩык Аԥсны Афырхаҵа ҳәа ахьӡ иаԥсоуп, 247-ҩык Леон иорден ранашьоуп, 623-ҩык "Агәымшәараз" амедал ранашьоуп. Аибашьра цонаҵы иҭахеит 260-ҩык аибашьцәа.

Ажәабжьқәа зегьы
0