АҞӘА, абҵара 1— Sputnik. Испаниа Аконституциатә ӡбарҭа аамҭала иааннакылеит Каталониа ахьыԥшымраз арезолиуциа аусура. Абри атәы аанацҳауеит РИА Новости.
Ииасыз ахәашазы Каталониа Апарламент алахәылацәа абжьыҭира мҩаԥыргеит Мадрид анапаҵаҟа аҵыҵразы. Абри ашьҭахь Мадридтәи аиҳабыра арегион аҟны ишиашоу анапхгара аланагалеит. Каталониа аиҳабыра (Аженералитет) русура ааныркылеит.
Ашәахьа Испаниа Апрокуратура хада Апарламент алахәылацәа, Каталониа аиҳабыра, Пучдемонгьы дналаҵаны рганахь ала аҳәынҭқарратә шьақәгылара аарҳәра рыгәҭакын ҳәа ирзашшит. Абри ашьҭахь Аженералитет ахадеи хәҩык иара иколлегацәеи Бриуссельҟа ицеит. Иҟан агәаанагарақәа урҭ уахь хыҵәахра ицеит ҳәа.
Аха аҩашаҽны Пучдемон арҭ агәаанагарақәа хирбгалеит.
Каталониа аиҳабыра уаанӡатәи аиҳабы Карлес Пучдемон Бриуссель дызԥылаз ажурналистцәа иреиҳәеит аполитикатә хыҵәахра гәҭакны ишимам.
Иара иажәақәа рыла Бриуссельҟа дааит ахақәиҭреи ашәарҭадареи рпринципқәа инарықәыршәаны аилкаара иоуп ҳәа.
Уаанӡатәи адыррақәа рыла каталониатәи аполитик иинтересқәа рыхьӡара дадгылеит бельгиатәи адукат Поль Бекарт. Бекарт абри атәы иҳәеит ателерадиоеилахәыра VRT.
Бекарт аамҭақәак рзы басктәи асепаратисттә гәыԥ "ЭТА" алахәылацәа Луис Моренои Ракель Гарсиеи ринтересқәа ихьчон.
Ахьыԥшымразы ареферендум мҩаԥган Каталониа жьҭаарамза алагамҭазы. Ареферендум алҵшәақәа азакәан шьаҭа рымам ҳәа иԥхьаӡан Мадрид.
