АҞӘА, абҵара 24— Sputnik. Дмитри Хворостовски наунагӡа абзиараз ҳәа иарҳәар ауеит абҵара 27 рзы, Москва, Чаиковски ихьӡ зху аконцерттә зал аҟны. Абри атәы рҳәеит Красноиарск атәылаҿацә акультура аминистрраҿы ҳәа аанацҳауеит РИА Новости.
Хворостовски акыршықәса ачымазара бааԥсы ицәа иалан. 2015 шықәса рзы иара аҳәамҭа ҟаиҵеит ихшыбаҩ ачыра амоуп ҳәа. Артист аҵыхәтәантәи аамҭақәа рзы Лондон дынхон.хворостовски диит Красноиарск ақалақь аҟны.
"Ашәаҳәаҩ Дмитри Александр-иԥа Хворостовски абзиараз ҳәа иаҳәареи аграждантә панихидеи мҩаԥгахоит абҵара 27 рзы, Москва, Чаиковски ихьӡ зху аконцерттә зал аҟны, асааҭ 10.00 инаркны 13.00 рҟынӡа. Красноиарск ацеремониа амҩаԥысра арыцхә азы макьаназ информациа ыҟам" ҳәа лҳәоит амаҵзура ахаҭарнак.
Уаанӡа Дмитри Хворостовски иԥсҭазараҿ аҵыхәтәантәи игәазыҳәарала иԥсыбаҩ акремациа азуны. ҩ-қалақьк: Москвеи Красноиарски рҟны анышә иамадахароуп ҳәа аҳәамҭа ҟаиҵахьан СССР жәлар рартист Иосиф Кабзон.
1989 шықәса рзы Би-би-си ателехәаԥшратә конкурс, Кардифф (Великобританиа) ақалақь аҟны имҩаԥысуаз, "Адунеи ашәаҳәаҩ" аҿы "Иреиӷьу абжьы" ҳәа иигаз аиааира ашьҭахь адунеи аҿы деицырдыруа дҟалеит. Ниццатәи (Франциа) Nice Opera аҟны Петр Чаиковски иопера "Пиковая Дама" аҟны иқәгылара ашьҭахь Дмитри Хворостовски днарыԥхьо иалагеит адунеи иреиӷьу атеатрқәа, афестивальқәа рахь.
Урҭ иреиуан: атеатр Ковент-Гарден (Лондон, Великобританиа), Метрополитен-опера (Ниу-Иорк, (США), Парижтәи аопера (Франциа), Бавариатәи аҳәынҭқарратә опера (Миунхен, Германиа), Ла Скала (Милан, Италиа), Венатәи аҳәынҭқарратә опера (Австриа), Зальцбургтәи афестиваль (Австриа).
