АҞӘА, жьҭаара 18 — Sputnik. Урыстәыла аԥыза-министр Дмитри Медведев Euronews аинтервиу анаиҭоз иазгәеиҭеит ЕАШ урыстәылатәи абанкқәа рганахь ала имҩаԥнаго асанкциақәа хәаахәҭратә еибашьраоуп ҳәа, иагьазгәеиҭеит Москва уи анырра аиааира алшоит ҳәа. Абри атәы аанацҳауеит РИА Новости.
Аԥыза-министр иҳәеит асанкциақәа рыхьанҭарала адунеитә економикатә еиҿкаара шьақәырҟьар рылшоит ҳәа.
"Ҳара ибзианы еилаҳкаауеит Америка имҩаԥырго аусқәа зегьы ирхықәку аҩныҵҟатә-политикатә хырхарҭа шрымоу. Европатәи атәылақәа рҿгьы иара убас ауп. Урыстәыла иаҿагыланы имҩаԥырго аусқәа зегь рҟынтәи 90% аҩныҵҟатә хықәкы рымоуп: амчраҿ аанхара, аиҳабыра реиҿкаара уҳәа реиԥш иҟоу", — иҳәеит Медведев.
Нанҳәамза алагамҭазы асенаторцәа ргәыԥк ахәаԥшраз ЕАШ Аконгресс хыхьтәи апалата ирыднагалеит урыстәылатәи абанкқәа, урыстәылатәи аҳәынҭқарратә уал, уҳәа рганахь ала асанкциа ҿыцқәа рзы азакәан апроект ҿыц.
