АҞӘА, рашәара 22 - Sputnik. Шәачантәи Ҭырқәтәылаҟа аҳаирпланқәа ԥырӡом, Урыстәылеи Ҭырқәтәылеи рыбжьара аҳаиртә еимадара анхацыркха ашьҭахьгьы ҳәа аанацҳауеит Урыстәыла атуроператорцәа Рассоциациа (АТОР) Росавиациа адыррақәа шьаҭас иганы.
Росавиациа рашәара 21 азы адырра ҟанаҵеит Ҭырқәтәылаҟа аҳаирпланқәа ахьынтәаԥыруа жәларбжьаратәи аҳаиртә баӷәазақәа рсиа аганахь ала. Зынӡа асиа иаҵанакит 32 қалақь.
Макьаназы Ҭырқәтәылаҟа аԥыррақәа ԥкуп абарҭ ақалақьқәа рзы: Барнаул, Белгород, Волгоград, Воронеж, Калуга, Краснодар, Липецк, Нальчик, Оренбург, Саратов, Шәача, Тиумень, Алада-Сахалинск. Арҭ ақалақьқәа рҟынтәи аҳаирпланқәа ԥырӡом 2021 шықәса мшаԥы 1 аахыс.
Ареисқәа рзинқәа ҟаҵоуп абарҭ ақалақьқәа рҟынтәи: Москва, Санкт-Петербург, Астрахань, Брианск, Владивосток, Владикавказ, Грозныи, Екатеринбург, Иркутск, Казань, Калининград, Кемерово, Красноиарск, Магнитогорск, Махачкала, Минвод, Нижнекамск, Нижни Новгород, Новосибирск, Омск, Пермь, Петропавловск- Камчатск, Ростов-на-Дону, Самара, Сыктывкар, Томск, Улан-Уде, Улиановск, Уфа, Хабаровск, Челиабинск.
Ҭырқәтәыла ахада Реџьеп Ердоган аҳәамҭа ҟаиҵеит, ԥхынгәы 1 инаркны акоменданттә сааҭ шаԥыххо азы. Иара убасгьы ари арыцхә инаркны аԥкрақәа аԥыххоит ақалақьбжьаратәи ауаажәларратә транспорти рыла аныҟәара.
Урыстәылатәи атуристцәа Ҭырқәтәыла иалалар ҟалоит алаҵа рзыҟаҵазар ма ПЦР-тест рымазаара шаҭахым азы аршаҳаҭга рымазар.
АТОР адыррақәа рыла Москва – Анталиа абилеҭқәа 21,5 нызқь инаркны 35 нызқь рҟынӡ иаԥсахоит аилахәыра иахьырԥшны.
