АҞӘА, хәажәкыра 23 – Sputnik, Роберт Џьопуа. Аестрадатә шәа анагӡаҩцәа XVI рреспубликатә конкурс "Аҿар рыбжьы" мҩаԥысит Аҟәа. Аконкурс раԥхьатәи амш хыркәшахеит гала-концерт ала. Абри атәы ҳзеиҭеиҳәеит аконкурс ашьаҭаркҩы Нури Кәарҷиа.
"Аконкурстә мшы раԥхьатәи азыбжазы иара аиндаҭлара ахаҭа мҩаԥган, ахәылбыҽха ҳара имҩаԥаагеит гала-концерт, ирылаҳҳәеит аиааира згаз рыхьӡқәа. Иреиҵбу агәыԥ аҟны аиааира лгеит — Викториа Ҵулукиа. 7-9 шықәса ирыҵаркуа рыбжьара – Сара Абраман. Иара убасгьы аконкурс иалахәын 15-17 шықәса зхыҵуаз ашәаҳәаҩцәа. Уи агәыԥ рыбжьара аиааира игеит Ромео Чаава (Гал). Адуетқәа рыбжьара актәи аҭыԥ аӡәгьы иаҭәашьамызт. Аҩбатәи аҭыԥ ааныркылеит аиҳәшьцәа Гадлиаа, ахԥатәи – аиҳәшьцәа Ҵышәаа", — иҳәеит Кәарҷиа.
Кәарҷиа иазгәеиҭеит аконкурс "Аҿар рыбжьы" аԥсуа естрада аҿиара ишазырхо.
"Ҳара ҳконкурс аҟазара еиуеиԥшым ахырхарҭақәа рыҿиара иазырхоуп", — иҳәеит иара.
Аконкурс рхы аладырхәит Аԥсны ахы-аҵыхәа аҟынтәи 50-ҩык рҟынӡа аҿар. Аконкурс аҟны ихымԥаданы иҟан аԥсуа ашәак аҳәара.
"Ҳконкурс иалахәуп аԥсуаа рыдагьы егьырҭ амилаҭқәа рхаҭарнакцәа. Урҭ зегьы гәахәарыла инарыгӡоит аԥсуа ашәақәа", — иҳәеит аконкурс ашьаҭаркҩы.
Аконкурс аҟынтә афотосахьақәа шәрыхәаԥшыр ҟалоит абра
Аестрадатә ашәа "Аҿар рыбжьы" XVI конкурс аҩбатәи амш мҩаԥысуеит хәажәкыра 23 рзы.
