Уасил Арухаа аԥсуа жәлар ринструментқәа рыҟаҵара далагеит Аԥсны Аџьынџьтәылатәи еибашьра анеилга ашьҭахь.
Инарҭбаау ажәабжь шәаԥхьар ҟалоит абра>>
"Анапҟазара снапы асыркит аибашьра ашьҭахь. Аиаша шәасҳәап, исцәагои ҳәа салагеит аԥхьа, акырӡа аџьабаа збеит, иара уааҟәымҵӡакәа уаҿызар акаҿы укылнагоит. Оҭар Хәынҵариеи сареи ҳаиҩызцәан, иара иоуп раԥхьа исазҳәаз аинструментқәа рыҟаҵара уаламго ҳәа, аԥхьа мап скит, иара абра дцо даауа дысҟәамҵӡеит. Иахьазы, аԥсуа инструментқәа зегьы ҟасҵоит. Анапҟазара зынӡа сшацәыхароугьы", — ҳәа иҳәоит Уасил Арухаа.
Аибашьра ашьҭахь ааха ӷәӷәа зауз акультура еиҭашьақәыргылатәын, аҵараиурҭақәа ирҭахын амузыкатә инструментқәа. Уасил Арухаа инапы злаикыз уи азы цхыраагӡа дуун.
Уасил Арухаа иажәақәа рыла, раԥхьаӡа иҟаиҵоз аинструментқәа рхаҭабзиара лаҟәын. Акы ҟаиҵацыԥхьаӡа иара Оҭар Хәнҵариа диазҵаауан.
"Исгәалашәоит зегь раԥхьа иҟасҵаз ачамгәыр. Уи санаҿыз убри ааҟара аџьабаа збеит, иаансыжьратә аҟынӡа снанагеит. Аха Оҭар Хәнҵариа иахьа иамузар, уаҵәы иауеит ҳәа саҳәо икасыжьратә иҟаимҵеит. Убас мацара сшаҿыз исықәманшәалахо иалагеит. Зегь реиҳа ихадароу амузыкатә инструмент аҟны абжьы агара ауп, аԥшӡара аасҭа. Ачамгәыр ашьҭахь сара иҟасҵеит аҩымаа, ахымаа, аԥхьарца. Аҿарпын аҟаҵаразы аматериал алԥшааразы акырӡа аџьабаа збеит. Уи даараӡа еиҭашәоуп", — ҳәа ацыиҵеит иара.
Аинструментқәа злыухлак ҟалаӡом, иҳәоит анапҟаза, доусы ирықәнаго аҵла алыухроуп.
"Амаҭәахә ааназго ихароуп сыхьцо, ҽыла сцоит, уахьынтә ирыцқьаны иаазгоит. Иахьа акы уаҵәы аҽакы, абасала иахәҭо сыԥшаауеит. Шьоукы-шьоукы аинструментқәа, сара исыздырӡом излысхуа аматериал, блала издыруеит акәмзар, аҵла избит издыруеит, аха иара абас ак ҟаҵо ҩба ҟаҵо иара аҵиаа аҟынӡа снеит, иахьӡугьы сыздыруам", — ҳәа иҳәоит иара.
