Роман Сабуа иажәақәа рыла аспекталь аҽазыҟаҵара напы адаркит шықәсы бжак уажәаԥхьа. Аспектакль иалахуп аԥсуа драматә театр актиорцәа жәаф-ҩык. Ахархәара змоу адекорациақәа аҭоурых аадырԥшуеит.
"Хра злоу ахҭысқәа": Самсон Чанба ихьӡ зху Аԥсуа драматә театр актиор Роман Сабуа арежиссиор Алхас Шамба икәыргыламҭа "Амҳаџьырра" далацәажәеит.
"Сгәаанагарала, даара иманшәаланы иҟоуп ҳдекорациақәа. Ирацәамкәаны, иаҳәо рацәаны, аҭоурых аанарԥшуа. Инҭкааны иаанарԥшуеит ҳажәлар ахьынхоз аҭыԥқәа зеиԥшраз усҟан. Символтә ҟазшьала акәзаргьы аишәа, аҟәардә ус рацәак ҳазгагамкәа, ус символ ҳасабла, аха аилкаареи, анырреи унаҭаратәы иҟаҵоуп адекорациақәа. Актиортә еилазаара атәы ҳҳәозар, иалаху актиорцәа рхыԥхьаӡара жәаф-ҩык рҟынӡа ыҟоуп, абжьаратә абиԥара реиԥш, аҿарацәагьы ҳалагылоуп", — ҳәа иҳәеит актиор.
Роман Сабуа иазгәеиҭеит ари аспектакль аԥсуа драматә сценаҟны ԥшьынтә ишықәдыргылахьоу.
