АҞӘА, жәабран 27 – Sputnik. США афинансқәа рминистр Стивен Мнучин аҳәамҭа ҟаиҵеит Урыстәыла аганахь ала асанкциа ҿыцқәа 30 мшы рыҩныҵҟа иаԥҵахоит ҳәа аанацҳауеит РИА Новости.
"Ҳара иаԥҵоу асанкциақәа наҳагӡалоит, урҭ инарываргыланы асанкциа ҿыцқәа аԥаҳҵалоит", — ҳәа аминистр Twitter аҟны иажәақәа ааигоит амаҵзура Блумберг акорреспондент Салеха Мохсин.
Ҟрыми Донбасси рҟны аҭагылазаашьази иара убасгьы "алхрақәа ахрылагаларазы" США иагәҭакуп Урыстәыла аганахь ала асанкциа ҿыцқәа раԥҵара.
2017 шықәса нанҳәамзазы Дональд Трамп Урыстәылеи, Ирани, КНДР-и ирзырхаз азакәан CAATSA инапы аҵеиҩит. Ҭагалан Аҩны шкәакәа ицәырнагеит асанкциақәа зыдҟаҵалазар алшо урыстәылатәи ахатәхаҿқәеи аиурист хаҿқәеи рсиа.
2018 шықәса ажьырныҳәа 29 рзы США афинансқәа рминистрра ицәырнагеит "кремльтәи асиа". Арахь иаҵанакит 200-ҩык рҟынӡа урыстәылатәи анаплакыҩцәа. Ажәахә иаанагом иаразнакы урҭ асанкциақәа рыдҟаҵалахоит ҳәа аха иахәҭаны ианыԥхьаӡаха хьаҳәа-ԥаҳәада асанкциақәа рзухоит.