АҞӘА, лаҵара 2 – Sputnik. Аоппозициатә депутат Никола Пашиниан знапхгараҿы дыҟоу аҿагыларатә акциа алахәылацәеи адемонстрантцәеи Аҵареи аҭҵаарадырреи, адиаспореи рминистррақәа рнеирҭа ркит.
Уаанӡа урҭ аҳҭнықалақь аҳаиртә баӷәаза "Звартноц" ахь уназго амҩаду ааныркылеит ҳәа аанацҳауеит Sputnik Армения. Аоппозициатә депутат Никола Пашиниан знапхгараҿы дыҟоу аҿагыларатә акциа алахәылацәа аҳҭнықалақь аҳаиртә баӷәаза "Звартноц". Акциа хацыркын аҭыԥантәи аамҭала асааҭ 8:10 рзы.
Уи иахҟьаны Еревантәи аҳаиртә баӷәазахь узго атрасса M5 аҿы шәкыла автомашьынақәа амҩа иангылоуп. Аполициа аусзуҩцәа ракәзар аҭагылазаашьа аҭыԥ ақәҵара нап аларкит.
Ермантәыла амилаҭтә еизара аҩашаҽны имҩаԥнагаз изаамҭанытәим аилатәараҿы адепутатцәа реиҳараҩык (56) Никола Пашиниан икандидатура иаҿагыланы рыбжьы рҭиит. Иара изы рыбжьы рҭиит 45-ҩык адепутатцәа ҳәа аанацҳауеит Sputnik Армения.
Пашиниан икандидатура мшаԥы 30 рзы иқәнаргылеит афракциа "Елк". Пашиниан далырхырц азы иоур акәын 105 рҟынтәи 53 бжьы.
Ермантәылатәи азакәанԥҵара инақәыршәаны мчыбжьык ашьҭахь имҩаԥысроуп алхра ҿыцқәа. Аҩбатәи атур аҟны Пашиниан иоуроуп ианеиҵаха 32 бжьы.
Аԥыза-министр убасҟангьы далхымхар, Амилаҭтә еизара еимдырпуеит, изаамҭанытәим алхрақәагьы мҩаԥгахоит 40 мшы рыҩныҵҟа.