АҞӘА, ԥхынгәы 4 — Sputnik. Сахалини аматерики еиҟәызшо Ҭаҭартәи аӡыбжьаха реиҳа иахьҭымыҭшәарроу аихамҩатә цҳа ахҵара азыԥхьагәаҭоуп. Ацҳа ахҵаразы аусурақәа ирылагараны иҟоуп 2021 шықәса рзы. Абри атәы иҳәеит Алада-Сахалинск имҩаԥысуаз агеотехникатә симпозиум аҿы Мрагыларахаратәи аихамҩа анџьныр хада Сергеи Дрокин, ҳәа аанацҳауеит РИА Новости.
Иара иажәақәа рыла, аусурақәа хәышықәса ҿҳәараны ирымоуп.
Ацҳа Хабаровсктәи атәылаҿацә ақыҭа Селихинои сахалинсктәи аиланхарҭа Ныши ирбыжьдоу 580 километр иҟоу аихамҩа иахәҭакхоит. Уажәазы адгьылбжьахеи аматерики рыбжьара еимадаганы иҟоуп апаран Ванино — Холмск. Аныҟәарақәа аԥсабаратә ҭагылазаашьа иадҳәалоуп.
Ацҳа ахҵара азҵаара изныкымкәа ицәырган. Апроект азыԥхьагәарҭахьан 1950-тәи ашықәсқәа рзгьы аха еиҭаҵрак амоуит. Азҵаара еиҭацәырҵит 2007 шықәса рзы.
Рашәара 7 рзы Владимир Путин азҵаарақәа рҭак ҟаҵо иҳәеит ацҳа Сахалин ауааԥсыра рзы хра аманы ишыҟоу, иара еиуеиԥшым апроблемақәа рыӡбра шалшо.