АҞӘА, цәыббра 24 — Sputnik. Украина арра-мшынтә мчрақәа рыӷбақәа ҩба амҽышаҽны Ҟрымтәи ацҳа иҵысит ҳәа аанацҳауеит РИА Новости, анаплакы "Крымские морские порты" аиҳабы Алексеи Волков иажәақәа ҵаҵаӷәыс иганы.
Мышкы уи аԥхьа аӷбақәа Ҟрым аԥшаҳәала имҩасит. Урҭ аҭыԥқәа рҿы дара мҩаԥыргон Урыстәыла ашәарҭадаратә маҵзура аӷбақәа. Амҽыша, асааҭ 13:50 рзы дара аканал иҭалеит, асааҭ 15:15 рзы ацҳа иҵысит.
"Арҭ аӷбақәа Азов иҟало украинатә афлот арра-мшынтә база ҿыц иахәҭакхоит. Аӷбақәа рекипаж ҭабуп ҳәа расҳәоит адҵа хьаҳәа-ԥаҳәада иахьынарыгӡаз" ҳәа иҩуеит Украина ахада Twitter аҿы.
Уаанӡа Киев аҳәамҭа ҟанаҵахьан Азовтәи амшын аҟны аҟазаара шарӷәӷәо азы. "Украинский военный портал" аҟны ирыҩуан акәылӡы-ӷбақәа Азовтәи амшын акваториахь рынашьҭра шазыԥхьагәаҭоу.
Украина амчрақәа ишырҳәо ала, арегион аҟны иаԥҵахоит арра-мшынтә база.