АҞӘА, абҵара 12– Sputnik. Анефҭ адунеитә хәыԥсақәа ашәахьа инаркны 1-1,5% ихалеит, Саудтәи Аравиа ԥхынҷкәынмза инаркны анефҭ аҵхра еиҵаҳтәуеит ҳәа аҳәамҭа иҟаҵаз иахырҟьаны. Абри атәы аанацҳауеит РИА Новости.
Ашәахьа, ашьыжь асааҭ 8:49 инақәыршәаны амарка Brent ахәԥса 1,55% ихалеит, иартәеит 71,27 доллар баррельк азы, амарка WTI —0,96% ихалеит, иартәеит 60,77 доллар баррельк азы.
Атреидерцәа Саудтәи Аравиа аенергетика аминистр Халида аль-Фалиха иажәақәа: ԥхынҷкәынымзазы мышкы аҩныҵҟала 500 нызқь баррель еиҵаны анефҭ ыҵаҳхуеит, ҳәа ииҳәаз ргәы рҽаннаҵеит.