АҞӘА, абҵара 29– Sputnik. Шәача аҳабла Лазаревское аҿы аӡиас Псезуапсе амҩа Днепровскаиа ахәҭак ықәнаӡәӡәааит ҳәа аанацҳауеит "Макс-Портал".
Ақалақь аҿы ақәоура ишаҿыц иаҿуп.
Уаанӡа аметеорологцәа адырра ҟарҵахьан Шәача иахьаҵанакуа ақәоура ӷәӷәа ҟалоит, аԥшасра аҵаны ҳәа. Иара убасгьы иазгәаҭан амшынцәқәырԥара 4 баллк рҟынӡа шыҟалоз.
Асиноптикцәа ишырҳәо ала амшцәгьа абҵара 29 ахәылбыҽханӡа ишыҟац иаанхоит.
АҶА аусзуҩцәа ауааԥсыра рахь адырра ҟарҵоит аӡқәа рааигәара аԥсшьара рҽацәхьаркырц, автомашьынақәа аҵлақәа, аӡыргаратә баннер дуқәа рыҵаҟа иаанырмыжьларц.