АҞӘА, ԥхынҷкәын 7 - Sputnik. Сиамтәи аӡыбжьахалаҿ иҟоу таитәи адгьылбжьаха Ко Самет иахьаҵанакуа зегьы апластик иалху апакетқәеи аконтеинерқәеи ахрархәара азин аанкылоуп. Ари аӡбра еилазгаз аштраф ддыршәалоит ҳәа аанацҳауеит РИА Новости апортал АТОР адыррақәа ҵаҵӷәыс иганы.
Ко Самет, Паттаи 100 километрак инацәыхараны ишьҭоуп. Апластик аҟынтәи аҵакыра ахы иақәиҭтәуп ҳәа аӡбра анрыдыркыла ашьҭахь атуристцәа ахархәаразы ирыдыргалоит ақьаадлых пакетқәа, асакьқәа.
Ко Самет есыҽны, бжьаратәла 1500-ҩык атуристцәа аҭаауеит. Имҩаԥгоу аԥхьаӡарала урҭ ианеиҵаха ааба-ааба пластик пакет ара инрыжьуеит. Иааидкыланы мышкы ахы-аҵыхәала 12 000 пакет аанхоит. Иара убри аан 1981 шықәса раахыс адгьылбжьаха Милаҭтә ҳәырԥсарраны иԥхьаӡоуп, адгьылбжьаха аиҳабыра ргәаанагарала ариаҟара пластик аекологиатә рыцҳарахь икылнагар алшоит.
Ко Самет инашьҭарххны апластик ахархәара мап ацәкхоит адгьылбжьаха Самуи аҿгьы.