АҞӘА, ԥхынҷкәын 13 — Sputnik. Германиа ашәарҭадаратә усбарҭақәа рхаҭарнак ишеиҭеиҳәо ала, ашәарҭадаратә усбарҭақәа уажәы аилкаара иаҿуп ахҭыс аныҟалоз аламҭалаз ихысуаз ахаҵа Германиантәи аҭел изасуаз дазусҭаз, насгьы дзизасуаз амзыз. Абри атәы аанацҳауеит РИА Новости, rbb Inforadio адыррақәа ҵаҵӷәыс иганы.
Арадиостанциа ахаҭарнак идыррақәа рыла, аҭел иасуан ахаҵа ахысра даналагашаз аламҭалазҵәҟьа. Убри аан иазгәаҭоуп аҭел иасуаз аҭак ширымҭаз.
Арадиостанциаҿы иазгәарҭоит ФРГ аҟынтәи иҟаҵаз аҭеласра аҽазныкгьы ишьақәнарӷәӷәоит "ахысыҩ" Германиа дадҳәалан ҳәа.
Аҩаша ахәылбыҽха, Страсбург ақалақь Қьырсаныҳәатәи аԥсаӡ ахьымҩаԥысуа аҭыԥ аҿы идырым ахаҵа ахысра ҭеиҵеит. Иҟоу адыррақәа рыла, хҩык ауаа ишьит, 12-ҩык ахәрақәа роуит.
Излашьақәдыргылаз ала, ихысуаз, 29-шықәса зхыҵуаз, ахаҵа Шериф Ш., ааигәа игылаз атакси мҵарсны дыбналеит. Иара иԥшааразы ршьапы иқәыргылан 720-ҩык Франциа азинмчратә органқәа русзуҩцәа.
Ахашаҽны аполициа официалла ирыладырҵәеит Страсбург ихысуаз ахаҵа иеиԥшу ауаҩы ифотосахьа.
Уаанӡа Париж апрокурор Реми Еитс аҳәамҭа ҟаиҵахьан, Страсбург ихысыз ҳәа агәаанагара ззыҟоу ауаҩы 27-нтә ацәгьа иухьаны иус рыӡбхьан Франциа, Германиа, Швеицариа ҳәа.