АҞӘА, ԥхынҷкәын 24— Sputnik. Агазмҩангага "Северный поток-2" швециатәи азонаҿ аусурақәа ирылагеит ҳәа аанацҳауеит РИА Новости, аҭыԥантәи арадио SR адыррақәа шьаҭас иҟаҵаны.
Амҽышаҽны амшынбаӷәаза Карлсхамн ахь инагаз атрубақәа рышьақәыргылара иалагеит.
Аргылара инадҳәаланы абаӷәазахь аусураз иааԥхьоуп 110-ҩык ауаа, иазыԥхьагәаҭоуп аҽа 30-ҩык радыԥхьалара.
Апроект "Северный поток-2" иазыԥхьагәанаҭоит 55 миллиард кубометр агаз Урыстәылантәи Балтиатәи амшын аҵала Европаҟа ииазго агазмҩангагақәа ҩба рышьҭаҵара. Агазмҩангага аргылара азин ҟарҵахьеит Германиа, Финляндиа, Швециа. Иазыԥшуп Даниа ақәшаҳаҭхара.
Агазмҩангага ашьҭаҵара хыркәшахоит 2019 шықәса анҵәамҭазы.
Апроект "Северный поток-2" аргылара аҿагылара арҭоит Украина назлоу атәылақәа, иара убасгьы ЕАШ – зхатә газ Европаҟа аекспорт аанкылахар ҳәа ишәо.
Уи адагьы Латвиа, Литва, Польша аҳәамҭа еицыҟарҵеит апроект политикатә проектуп ҳәа ахҳәааны.
Владимир Путин иажәақәа рыла, Москва апроект економикатәуп ҳәа мацара иаԥхьаӡоит.