АҞӘА, ажьырныҳәа15 — Sputnik. Апортал РИА Новости Украина анапхгаҩы иганахь ала аӡбараԥхьатәи аусҭҵаара хыркәшахеит ажьырныҳәа 14 рзы. Вышински иоуит алшара 30 том инаӡо иусшәҟәқәа рыԥхьаразы.
Ахьчаратә ган аусҭҵааратә материалқәа рыҭоуп ҳәа аанацҳауеит РИА Новости.
Вышински идукат Андреи Домански иажәақәа рыла ахьчаратә гани, иара Кирилл Вышинскии ихаҭеи аматериалқәа рыхәаԥшра хацдыркит. Уи азы иалкааны ҿҳәара шьақәыргылам.
Вышински иаанкылара аҿҳәара арыцхә нҵәоит ажьырныҳәа 27 рзы. Апрокуратура азыҳәа ҟанаҵеит аҿҳәара арыцхә жәабран 16 рҟынӡа инахазарц. Ари азыҳәа Херсонтәи аӡбарҭа ажьырныҳәа 17 рзы иахәаԥшраны иҟоуп.
Апортала РИА Новости Украина анапхгаҩы Кирилл Вышински даанкылан Киев, лаҵара 15, 2018 шықәса рзы. Ажурналист аҳәынҭқарра аԥсахра мҩаԥигоит ҳәа ахара идырҵоит. Абри ахәҭаҷ ала иазыԥхьагәаҭоуп 15 шықәса рҟынӡа ҭакрала ахгара.
Херсонтәи ақалақьтә ӡбарҭа лаҵара 17 рзы Вышински даанкылатәуп ҳәа аӡбара аднакылеит. Аӡбарҭа аилатәараан Вышински Урыстәыла ахада иахь ацхыраара даҳәеит. Иара убасгьы аҳәамҭа ҟаиҵеит Украина атәылауаҩра мап шацәикуазы.
Владимир Путин аҭагылазаашьа зеиԥш ҟамлац ауп ҳәа ахиҳәаит.
Москва Киев иазынанашьҭит апресса ахаҭарнакцәа рганахь ала ақәымчраҟаҵара иаҟәыҵырц аҿагыларатә нота.
Амассатә информациатә хархәагақәа рхақәиҭра азҵаарақәа рзы ОБСЕ ахаҭарнак Арлем Дезир уаанӡагьы агәҭынчымра ааирԥшхьан Киев апортал РИА Новости Украина аганахь ала ахымҩаԥгашьазы. Дезир ааԥхьара ҟаиҵахьеит ажурналист ихы дақәиҭтәызарц.