АҞӘА, жәабран 4 - Sputnik. Римтәи Папа Франциск Еиду Арабтәи Аемиратқәа дырҭаарц амҩа дықәлеит амҽыша ҳәа аанацҳауеит РИА Новости.
"Еиду Арабтәи Аемиратқәа рахь амҩа сықәлоит иашьак иҳасаб ала, аҭынчра амҩа ҳаицанысырц. Сыхьӡала Анцәа шәимҵаныҳәала", - ҳәа иҩуеит апонтифик Twitter аҿы.
Римтәи Папа Франциск Римтәи-акатоликатә уахәама аҭоурых аҿы раԥхьаӡа акәны Аравиатәи адгьылбжьаха даҭаауеит.
Абу-Дабиҟа иԥырра аламҭалаз, Ватикан амҽышатә нцәаимҵаныҳәара аамҭазы апонтифик иныҟәара "аамҭала икьаҿу аха аҵакы дуны измоу" ҳәа дахцәажәеит.
Еиду Арабтәи Аемиратқәа рҿы Франциск ихы алаирхәуеит жәларбжьаратәи адинбжьаратә еиԥылара.