АҞӘА, жәабран 19 - Sputnik. Урыстәыла Адәныҟатәи аусқәа рминистрра аофициалтә хаҭарнак Мариа Захарова ЕАШ ахада Дональд Трамп Венесуела аруаа рахь Хуан Гуаидо амнистиаз иажәадгала иазкны иҟаиҵаз ааԥхьара шантажуп ҳәа ахылҳәааит. Абри атәы аанацҳауеит РИА Новости.
"Ашантаж – венесуелатәи ажәлар адемократиа рзырхынҳәра аҳасаб ала", - ҳәа лыҩуеит Facebook аҟны Захарова Трамп иҳәамҭа ахҳәаа аҭо.
Трамп ашәахьаҽны Венесуелатәи аеммигрантцәа рҿаԥхьа Маиами дықәгыло Венесуела аруаа рахь ихы нарханы иҳәеит Хуан Гуаидо амнистиаз иажәадгала адгылара арҭарц. Уи адагьы Трамп инаҵшьны иазгәеиҭеит ЕАШ гәҭакны ишамоу "амчра ҭынчымҩала аԥсахра, аха ианаму, аҽа хырхарҭақәак шыԥшаахо" атәы.
Ажьырныҳәа 21 рзы Венесуела иахьатәи ахада Николас Мадуро иҿагыланы Каракас ақәгыларақәа ирылагеит. Апарламент аспикер Хуан Гуаидо ажьырныҳәа 23 рзы атәыла ахадас ихы рылеиҳәеит.
Гуаидо истатус адгылара арҭеит: ЕАШ, Канада, Аргентина, Бразилиа, Чили, Колумбиа, Коста-Рика, Гватемала, Гондурас, Панама, Парагваи, Перу, Қырҭтәыла.
Урыстәыла Мадуро адгылара инаҭоит аконституциатә шьаҭа зманы иҟоу атәыла ахадак иҳасаб ала.
Европатәи атәылақәа зеижә: Испаниа, Португалиа, Германиа, Великобританиа, Даниа, Нидерланды, Франциа, Венгриа, Австриа, Финлиандиа, Бельгиа, Лиуксембург, Чехиа, Латвиа, Литва, Естониа, Польша, Швециа, Хорватиа, Македониа, Румыниа жәабран 4 рзы рнапы еицаҵарҩит адеклорациа, иазгәарҭеит Хуан Гуаидо аамҭалатәи Венесуела ахада ҳәа дшазхарҵо азы.