АҞӘА, хәажәкыра 26 – Sputnik. Венесуела ахада ихаҭыԥуаҩ Делси Родригес ажәылара ҿыц азы аҭакԥхықәра зду ЕАА рмаӡныҟәгаҩ хада Маик Помпео, асенатор Марк Рубио, амилаҭтә шәарҭадаразы атәыла ахада иабжьгаҩ Џьон Болтон роуп ҳәа агәаанагара лымоуп. Абри атәы аанацҳауеит РИА Новости.
"ЕАА рмаӡныҟәгаҩ хада Маик Помпео, асенатор Марк Рубио, амилаҭтә шәарҭадаразы атәыла ахада иабжьгаҩ Џьон Болтон – абарҭ ахҩык роуп ҳажәлар арыцҳара иҭазыргыло рхадараҿы иҟоу", - лҳәоит Делси Родригес.
Лара лажәақәа рыла, раионқәак рыда, егьырахь зегьы афымцалашара аиура еиҭашьақәыргылан, сааҭқәак роуп аҭагылазаашьа зегьы аҭышәныртәаларазы иаҭаху.
Хәажәкыра 7 рзы Венесуела иреиҳаӡоу, 80% атәыла фымцалашарала еиқәзыршәо "Эль-Гури" ГЕС аҟны авариа ҟалеит. Абри ашьҭахь атәыла аштатқәа 20 фымцалашарада иаанхеит.
Афымцалашаразы Амилаҭтә корпорациа (Corpoelec) иҟалаз Венесуела иаҿагыло диверсиоуп ҳәа ахнаҳәааит.
Ажьырныҳәа 21 рзы Венесуела иахьатәи ахада Николас Мадуро иҿагыланы Каракас ақәгыларақәа ирылагеит. Апарламент аспикер Хуан Гуаидо ажьырныҳәа 23 рзы атәыла ахадас ихы рылеиҳәеит.
Усҟан Гуаидо истатус адгылара арҭеит: ЕАА, Канада, Аргентина, Бразилиа, Чили, Колумбиа, Коста-Рика, Гватемала, Гондурас, Панама, Парагваи, Перу, Қырҭтәыла.
Урыстәыла Мадуро адгылара инаҭоит аконституциатә шьаҭа зманы иҟоу атәыла ахадак иҳасаб ала.
Европатәи атәылақәа зеижә: Испаниа, Португалиа, Германиа, Великобританиа, Даниа, Нидерланды, Франциа, Венгриа, Австриа, Финлиандиа, Бельгиа, Лиуксембург, Чехиа, Латвиа, Литва, Естониа, Польша, Швециа, Хорватиа, Македониа, Румыниа - жәабран 4 рзы рнапы еицаҵарҩит адекларациа, уа иазгәарҭеит Хуан Гуаидо аамҭалатәи Венесуела ахада ҳәа дшазхарҵо азы.
Аԥсны ахадеи Венесуела ахада Николас Мадурои еиԥылеит