АҞӘА, лаҵара 8 – Sputnik. Sukhoi Superjet 100 Ростов-на-Дону аҟынтәи аԥырра азин ҟармҵеит аиқәымшәарақәа рзы ҳәа аанацҳауеит РИА Новости.
"Аҳаирплан атехникатә еиқәымшәарақәа рзы апассаџьырцәа аҳаирплан аанрыжьит. Урҭ егьырҭ ареисқәа рыла рымҩа иқәырҵеит", - ҳәа аҳәоит адырраҭараҿы.
Уаанӡа, Шереметьево апассаџьыртә ҳаирплан Sukhoi Superjet 100 Москва - Мурманск амца акит лаҵара 5 рзы. Уи 28 минуҭ аҳауа ишалаз, иаалырҟьаны иахьынтәишьҭыԥрааз аҳаирбаӷәаза Шереметьево ахь ихынҳәыр акәхеит. Аҳауатә ҭагылазаашьа иахҟьаны, ҩынтә атәарҭа иахыԥраауан. Иантәоз аҳаирплан ашассиқәа ԥҵәеит, аусаругақәа амца рыцралеит.
Аҵыхәтәантәи адыррақәа рыла, 78-ҩык апассаџьырцәа рахьтә 41 ҭахеит, 37-ҩык еиқәхеит.
Иҟалаз авариа инамаданы ҩыџьа ма инареиҳаны ауааԥсыра рыԥсҭазаара ралҵра зыхҟьаз аҳаиртә транспорт ашәарҭадара аԥҟарақәа реилагаразы ашьаусҭҵаара хацыркуп.