АҞӘА, рашәара 24 - Sputnik. Урыстәыла ахада Владимир Путин Урыстәыла аганахь ала иалагало асанкциақәа рҭакс афатәлыҵтә ембарго аҿҳәара иациҵеит. Абри азы Аусԥҟа кьыԥхьуп азинтә информациа аофициалтә интернет-портал аҿы.
2014-шықәса нанҳәамзазы Путин инапы аҵеиҩит Аусԥҟа, Урыстәыла аганахь ала асанкциақәа алазгалаз атәылақәа: ЕАА, Евроеидгыла атәылақәа, Канада, Австралиа, Норвегиарҟынтәи ақыҭанхамҩаалыҵ Урыстәылаҟа аҳәааҭагалара азин ҟазымҵо. Ззин ыҟам аалыҵ ахь иаҵанакуеит: акәацлых, ахшлыҵ, аԥсыӡ, ауҭраҭых, ашәыр, арасалых.
Мраҭашәаратәи асанкциақәа аус руанаҵы урҭ рҭак усмҩаԥгатәгьы аус аулоит. Уажәы аембарго аҿҳәара 2019 анҵәамҭанӡа инахоуп.