АҞӘА, нанҳәа 8 – Sputnik. Киргизиа амаҵзура ҷыдақәа Киргизиа уаанӡатәи ахада Алмазбек Атамбаев иаанкылараз аоперациа ҷыда иалагеит ҳәа аанацҳауеит РИА Новости.
Амаҵзура адыррақәа рыла Кои-Таш игылоу Атамбаев иҩны ажәылараан жәаҩык рҟынӡа аахақәа роуит. Алмазбек Атамбаев идгылаҩцәа адырра ҟарҵоит Атамбаев даанкылоуп ҳәа.
Иҟоу адыррақәа рыла арезиденциа акәша-мыкәша шәҩыла ауаа гылоуп. Урҭ иара идгылаҩцәа роуп.
Киргизиа уаанӡатәи ахада дкоррупцианеруп ҳәа ахара идырҵоит. Уи адагьы ихарарҵоит акриминалтә авторитет Батукаев ихы дақәиҭитәит, адгьылқәа ишон ҳәа.
Ԥхынгәы анҵәамҭазы адепутатцәа Атамбаев илакьымсра астатус ихырхит. Аполитик ихарарҵо акгьы дақәшаҳаҭхом.
Атамбаев атәыла дахагылан 2011 - 2017 шықәсқәа рзы.