АҞӘА, жьҭаара 15 - Sputnik. Ҭырқәтәылатәи амчрақәа жәабала аусҭҵаарақәа хацдыркит аоперациа "Источник мира" иашам ҳәа ахызҳәааз атәылауаа рганахь ала. Иаанкылоу рыгәҭа иҟоуп Курдистан аусутә партиа иадҳәалоуп ҳәа агәаанагара зызроуз ақалақьқәа ԥшьба рхадацәагьы. Абри атәы аанацҳауеит РИА Новости.
Ақалақьқәа Ерджиш, Хаккари, Иуксекова, Нусаибин рхадацәа Курдистан аусутә партиа иадҳәалоуп ҳәа иаанкылоуп.
Иаанкылоу - Иылдыз Четин, Џьихан Кахраман, Ремзие Иашар, Семире Нергиз – ажәларқәа рдемократиа Апартиа иалахәылацәоуп. Рыҩнқәеи русуратә ҭыԥқәеи рҿы имҩаԥгаз аԥшаараан ицәырган изакәаным аиҿкаара иадҳәалоу адокументқәа ҳәа рҳәоит апрокуратураҿы.
Уи адагьы Ҭырқәтәыла апрокуратура хада аусҭҵаара иалагеит ПДН ацхантәаҩцәа Первин Булдани Сезаи Темелли рганахь ала.
Ҭырқәтәыла ахада Таип Ердоган жьҭаара 9 рзы аҳәамҭа ҟаиҵеит аоперациа "Источник мира" ишалаго азы. Аоперациа азырхоуп Ҭырқәтәыла ззин ыҟам Курдистан аусутә партиеи атеррористтә гәыԥ "Исламское государство" рықәгара.
Шьамтәылатәи амчрақәа изныкымкәа Ҭырқәтәыла имҩаԥнаго аоккупациатә политика иақәыӡбахьеит.
Урыстәыла акәзар, Ҭырқәтәыла аимак иаԥырхагахаша аусқәа аҽрыцәхьанакыроуп ҳәа иашьоит.