"Ӡынгьы -ԥхынгьы амшын сҭалоит. Санааҭыҵлак даара фырхаҵарак ҟасҵаз џьысшьоит, аха фырхаҵарами угәы бзиазар. Ажәра Анцәа иуаҭәеишьааит ҳәа анырҳәо аԥсуаа, иазгәарҭоит шьапыла уажәыр еиӷьуп, хыла аасҭа ҳәа. Аҩбагьы рҟны аԥсыҽрақәа ыҟоуп, аха сҽасҭаӡом. Санныҟәо абыржәы – уажәшьҭан санцәыҵаххуеит ҳәа саншәогьы ыҟоуп, аха сҽааныскылоит. Анцәа ухшыҩ умыихуеит рҳәоит, ухшыҩ акәӡам алаф, аиумор умыихуеит. Убри умыихыр-уҟаӡам. Ауаҩы дмыччар, иара еиԥш рыцҳа дыҟаӡам. Хумар-аиумор аԥсуа рҟынтәи ауп ишцаз, ахәмарра ҳара иаҳтәуп аӡәгьы иаҳцәыимгароуп", - иҳәеит длафуа аиубилиар.
Иара иазгәеиҭеит ауаа аныимбо, Аҟәаҟәа данымаауа игәы ихьуеит ҳәа.
"Абыжәырҭаҟны (Брехаловка), атеатр аҟны, афилармониа аҟны, сахьнеилакгьы ауаа алаф расҳәар, исырччар сҭахуп... Дара гәахәарала сыԥсҭазаара аҟазара аҟны исхызгеит ҳәа сгәы иаанагоит", - иҳәеит Чқәан.
Никәала Константин –иԥа Чқәан 1965 шықәсазы далгеит Луначарски ихьӡ зху Москватәи аҳәынҭқарратә атеатртә институт, СССР Жәлар рартист, апрофессор Андреи Гончаров иҵаҩы иоуп. Еиуеиԥшым ашықәсқәа рзы Шәачатәи ателестудиа, Аԥснытәи аҳәынҭқарратә филармониа рҟны арежиссиорс аус иуан. Асатиреи аиумори ртеатр "Чарирама" аҟны актиорс, режиссиорс дыҟан. Аԥснытәи Аҳәынҭқарратә театр аҟны иқәиргылеит аспектакльқәа "Абзамыҟә" Назым Хикмет иҩымҭала, "Агага" Шварц иҩымҭала.
Никәала Чқәан актиор иаҳасабала атеатр аҟны инаигӡеит арольқәа Есыф, ("Асас еиқәаҵәақәа" Гь.Гәылиа , 1956), Сгәанарель ("Иҭахы- иҭахым ахәшәтәҩы" Молиер, 1956), Хабжькәыт ("Аиааира", В.Агрба, 1961), Бессонов ("Данаҟаи" М. Лакрба, 1956).