Беиаԥҳа: Анцәа исаҭәеишьаз сышықәсқәа среигәырӷьоит, урҭ рыла сгәы дууп
© Sputnik
"Сышықәсқәа рыла сгәы дууп, изӡаӡом 60 ахьысхыҵыз, сеигәырӷьоит Анцәа исаҭәеишьаз ашықәсқәа. Раԥхьа сиира амш сыдызныҳәало сыҷкәын, смоҭацәеи сҭацеи роуп. Дара исыдырныҳәалоит ауха асааҭ 12 рынахыс, рышьҭахь сашьцәа, саҳәшьцәа, сҩызцәа, сыуацәа зегьы. Ҳәара аҭахума, сеигәырӷьоит сахьыргәалашәо, бзиа сахьырбо. Абзиабара аҩшара даара акраҵанакуеит ауаҩы иԥсҭазаараҿы, бзиабарада, гәыбылрада даара иуадаҩуп аԥсҭазаара. Ас еиԥш амшқәа раан адныҳәаларақәа аныҟаҳҵо, еимаҳдоит ҳенергетика, ҳаҩныҵҟатәи ҳдоуҳа, амч бзиа. Сара пату ақәысҵоит ус еиԥш аизыҟазаашьа", - лҳәеит Беиаԥҳа.
Иаҳа инеиҵыхны аиҿцәажәара шәаҳар шәылшоит арадио Sputnik Аԥсны аефир аҟны.