АҞӘА, мшаԥымза 2 - Sputnik. Урыстәыла ахада Владимир Путин алаҳәара ҟаиҵеит иусуратәым амшқәа рыҿҳәара мшаԥы 30 рҟынӡа инахоуп ҳәа. Убри аан аулафахәы шыҟац иаанхоит. Иара убасгьы акоронавирус аҿагыларазы атәыла асубиектқәа рхадацәа азинмчрақәа риҭоит иахәҭаны иҟалар алшо ауснагӡатәқәа рыдкыларазы.
Аҳақьымцәа ирылшо ҟарҵоит
Владимир Путин иҳәамҭа алагамҭазы иазгәеиҭеит аҳақьымцәа, амедицинатә еиҳәшьцәа, аперсонал зегьы коронавирус аепидемиа иаҿагыланы ирылшо зегь ҟарҵоит ҳәа.
"Амедицинатә усҳәарҭақәа русзуҩцәа зегьы имариам арежим иқәныҟәаны русура мҩаԥысуеит. Дара роуп ахәышәтәырҭақәа рҟны аҿкытә ҟәшақәа рҿы аепидемиа алмыршаразы аԥхьатәи ацәаҳәаҿы игыло", - иҳәеит иара.
Путин ҭабуп ҳәа реиҳәеит акоронавирус иаҿагыланы ақәԥараҿы аҭакԥхықәра иаҵагылаз зегьы. Убри аан иара иазгәеиҭеит адунеи зегьы аҿы акоронавирус макьаназы аҳра шауа.
Иԥсшьарамзахаз мшаԥы
Акоронавирус иадҳәалоу аҭагылазаашьа инамаданы Урыстәыла ахада Владимир Путин алаҳәара ҟаиҵеит иусуратәым амшқәа рыҿҳәара мшаԥы 30 рҟынӡа инахоуп ҳәа.
Путин иазгәеиҭеит иаҳхысыз амчыбжь усуратәымкәа аҟаҵара акоронавирус аепидемиа шьаҿак иаԥнагеит ҳәа.
Атәыла ахада иазгәеиҭеит иҟало аҭагылазаашьа иаҿырԥшны аиҳабыра иусуратәым амшқәа рхыԥхьаӡара еиҭаркуеит, иалшоны иҟалозар еиҵартәуеит ҳәа.
Абарҭ амшқәа раан рус нарыгӡоит аҳәынҭқарратә мчрақәа, ахәышәтәырҭақәа, адәқьанқәа, аԥҭекақәа.
Асубиектқәа рхадацәа азинмчцҵа роуеит
Владимир Путин иҳәеит Урыстәыла арегионқәа рхадацәа азинмчра цҵақәа роуеит ҳәа. Иазгәеиҭеит дара амчыбжь нҵәаанӡа акоронавирус аламырҵәаразы иахәҭаны иршьо ауснагӡатәқәа алыркаарц.
"Афедерациа асубиектқәеи асубиектқәа рхадацәеи сара сыдҵала азинмчцҵа рыҭахоит. Дара амчыбжь нҵәаанӡа зхадараҿы иҟоу арегионқәа рҿы акоронавирус аламырҵәаразы иахәҭаны иршьо ауснагӡатәқәа алыркаароуп", - иҳәоит Путин.
Владимир Путин анапынҵа ҟаиҵеит арегионқәа рҿы атранспорт хархәагақәеи ауааԥсыреи рныҟәара аԥҟарра азышьақәдыргыларц.
Арегионалтә мчрақәа иара убасгьы имҩаԥырго аусқәа асанитар-епидемиологиатә маҵзурақәа ақәшаҳаҭзароуп.
"Иҟоу аинформациа Урыстәыла аиҳабыра рҟны иаԥҵоу акоординациатә хеилак ахь инеилароуп. Уа аус адырулалароуп аӡбра иашақәа рыдкыларазы", - иҳәеит Путин.
Москва аҭагылазаашьа зеиԥшроу
Путин иажәақәа рыла, Москва макьаназы аҭагылазаашьа аиҭакшьа амамкәа иҟоуп.
Владимир Путин урыстәылаа рахь ааԥхьара ҟаиҵеит амедицинатә усзуҩцәеи аиҳабыратә мчрақәеи рабжьгарақәа ирықәныҟәаларц.
Путин агәрагара ааирԥшит ҳәоуеиқәшәала ахымҩаԥгараан аԥыжәара шырго азы. Владимир Пути атәылауаа рахь иҟаиҵаз аҳәамҭа 8 минуҭки 10 секундки аефир аҿы ицон.
Уаанӡа, хәажәкыра 25 рзы иҟаиҵаз аҳәамҭа 17 минуҭи 30 секунди инаӡон.
Акоронавирус иадҳәалоу аҵыхәтәантәи ажәабжьқәа шәрыԥхьар ҟалоит абра>>