АҞӘА, ԥхынгәы 8 - Sputnik. Урыстәыла азыхиоуп аурысқәа аузыжьуа егьырҭ атәылақәеи иареи рыбжьара аҳәаа аартра азҵаарала аусура, аха акоронавирус иадҳәалоу асанитартә-епидемиологиатә ҭагылазаашьа азгәаҭалатәуп, ҳәа адырра ҟанаҵоит РИА Новости Афедерациа Ахеилак ахантәаҩы Валентина Матвиенко лажәақәа шьаҭас иааганы.
"Аҳәаа еснагь ҩ-ганк амоуп. Урыстәыла агәы иҭам ихыҭхәыцаау аԥкрақәа ралагалара, аҳәаа аркра, атәылауаа роумышьҭра… Ари ҩ-ганклатәи аизыҟазаашьақәа ирызҵаароуп, атәылақәа аурыс туристцәа рыдкылара иахьынӡазыхиоу иазҵаароуп. Аполитика иадҳәалам, асанитартә-епидемиологиатә ҭагылазаашьоуп изыдҳәалоу", – лҳәеит Матвиенко.
Ԥхынгәы 2 рзы Аԥсны ахада Аслан Бжьаниа аҳәамҭа ҟаиҵеит аҳәаа аартра азҵаара раԥхьаӡа инаргыланы изыдҳәалоу Урыстәыла ишьақәгылоу аепидемиологиатә ҭагылазаашьоуп ҳәа, уи аӡбараан аҩ-тәылак шьаҿеиқәшәала акаҿы еизааироуп ҳәагьы ациҵеит. Атәыла ахада иазгәеиҭеит аҳәаа аартра аганахьала Урыстәыла аԥыза-министр михаил Мишустин иахь асаламшәҟәы шиҩыз атәы.
Иара убас шәаԥхьар ҟалоит:
- Бжьаниа аҳәаа аартразы: Урыстәылеи ҳареи ҳшьаҿақәа еиқәыршәаны иҟаҳҵалароуп