Амзар аҟны ҭагалан шарбоугьы, макьана акыр иԥхарроуп Аԥсны. Амшынҭалара аамҭа макьана ихыркәшам, аплиажқәа рҟны рыԥсы ршьоит атуристцәа, иара аҭыԥантәиқәагьы макьана иуԥылоит. Аҳауаԥхарра +23°С, +25°С иҟоуп, амаҭәа ԥхақәа макьана адулаԥқәа ирҭоуп.
Аха ҭагалан шааиз уеилдыркаауеит аҭыԥантәи аџьармыкьақәа рҟны ицәырҵыз - ахәырма (акоролиок), аџьықәреи, ахьа, аҟаб, иара убас макьана иҵәыҵәызаргьы, ицәиаҵәоу амандарина.
Абарҭқәа зегьы рыхә ҳаракцәамкәа иааухәар улшоит Аҟәатәи аџьармыкьаҿы. Уи уажәшьҭа баша хәаахәҭырҭам, ара хымԥада атуристцәа зегьы зҭааша ҭыԥхеит. Урҭ гәахәарыла иаархәоит ашәыр, афатә архаагақәа, ашә, ажьҵаа, аԥсуа чыс хаақәа, ачаи, ацха уҳәа. Уи адагьы аҩны иҟарҵо аҩи ауаткеигьы уԥыхьашәар алшоит.
Аҟәатәи аџьармыкьа есҽны аус ауеит, ашәахьада.