АҞӘА, хәажәкыра 24 - Sputnik. Урыстәыла Аҳәынҭдума иаднакылеит алхрақәеи ареферендуми рзы азакәанԥҵара Урыстәылатәи Афедерациа Аконституциа иалагалаз аиҭакрақәа ирықәшәартә иҟазҵо азакәан, ҷыдала иуҳәозар, уажәтәи атәыла ахада даҽа ҩ-ҿҳәарак ахадас дҟаларазы аҽықәыргылара илнаршоит, ҳәа аанацҳауеит РИА Новости.
Ахада иҿҳәаразы аԥшьгамҭақәа равторцәас иқәгылеит адепутатцәа Павел Крашенинникови Ольга Савастиановеи, иара убас асенатор Андреи Клишас.
Урыстәылатәи Афедерациа Аконституциа ахәҭаҷ 81 иқәнаргыло аԥҟарақәа инарықәыршәаны, "Урыстәылатәи Афедерациа ахада изы" азакәан аҟны ишьақәырӷәӷәахоит Урыстәыла ахадас "дҟалар илшоит 35 шықәса иреиҵбам Урыстәылатәи Афедерациа атәылауаҩ, 25 шықәса иреиҵамкәа иааиԥмырҟьаӡакәа Урыстәыла инхо, атәым ҳәынҭқарра атәылауаҩра змам, уаанӡагьы измамыз, ма анхаразы адокумент ма даҽа документк змам ауаҩы".
Убри аан адокумент аҿы иазгәаҭоуп Урыстәыла уаанӡа иаламыз, аха афедералтә конституциатә закәан инақәыршәаны анаҩс иалаҵаз аҳәынҭқарра ма уи ахәҭак атәылауаҩыс дыҟазҭгьы.
Уи адагьы, азакәан аҿы иарбоу ахада ҩ-ҿҳәарак инеиҳаны атәыла ахадас иҟазаара ԥызкуа аԥҟарақәа.
"Урыстәыла Аконституциа атәыла ахадас иҟало ахаҿы изы аҿҳәарақәа ԥызкуа аԥҟарақәа ахархәара роуеит Аконституциа аиҭакрақәа ралагалара аамҭазы ахадас иҟаз ахаҿы шаҟа ҿҳәара ари амаҵура дахагылаз ҳасаб азымукәа. Уи илнаршоит Урыстәылатәи Афедерациа ахада имаҵура ааникылар абри аԥҟараҟны иарбоу аҿҳәарақәа раан", - ҳәа аҳәоит адокумент.