АҞӘА, мшаԥы 20 - Sputnik. Мызқәак ирхымгакәа акоронавирустә пандемиа ахылаԥшра аиуртә иҟалоит, уи азы иахәҭаны иԥхьаӡоу ауснагӡатәқәа еиԥҟьарада мҩаԥгалазар ҳәа аҳәамҭа ҟаиҵеит Агәабзиарахьчараз адунеизегьтә еиҿкаара (ВОЗ) аиҳабы Тедрос Гебреиесус.
"Апандемиа мызқәак рыҩнуҵҟала анапаҿы аагара алзыршо аресурсқәа ҳамоуп, аха убри аан еиԥҟьарада иахәҭоу ауснагӡатәқәа ирықәныҟәалатәуп", - ҳәа иҳәеит иара.
Тедрос Гебреиесус убри аан иазгәеиҭеит акоронавирус 25 - 59 шықәса зхыҵуа ркатегориаҿы аҽшышьҭнахыз. Гебреиесус ари авирус авариант ҿыцқәа ирыдиҳәалоит.
Иахьатәи аамҭазы адунеи аҿы аа-мчыбжьы ирықәуп COVID-19 аҽышьҭнахуеижьҭеи. Ииасыз амчыбжь абри аганахьала ирекордтәын - 5,2 миллион-ҩык ачымазара шьҭыркааит.