Аԥсны еизгоу акоманда аиааира агеит ConIFA аверсиала ашьапылампыл азы 2016 шықәсазтәи адунеи ачемпионат аан, уи афинал аҟны Пенџьаб акоманда иаиааит 6:5 ҳәа. Убри аан аматч аамҭа хада хыркәшан 1:1 ҳәа, аиааира згаз далкаахеит 11-метратәи апенальтиқәа расраан.
55-тәи аминуҭ аан аԥсуа команда Пенџьаб акоманда ахьчаҩцәа зегьы ирылганы ампыл амбахь ишзахәоз ирышьҭит, аха аҭаршәра рылымшеит, убри ашьҭахьҵәҟьа пенџьабаа аҭак ҟарҵеит - ампыл рыманы аԥсуаа рымба иажәлан, Амар Перваль ҳамба иҭаиршәит. Абасала, атурнир аҿы уаанӡа мпылкгьы зцәымцацыз Аԥсны акоманда актәи ампыл рымба иҭашәеит.
Ахәмарра нҵәаанӡа х-минуҭк шагыз, ҳазегьы ҳаззыԥшыз ахҭыс ҟалеит - Руслан Шьониа Пенџьаб амба ампыл ҭаиршәит.
Иаанхаз аамҭа иалагӡаны акомандақәа уаҳа ампыл ҭадмыршәит, убри азы жәеизаметратәи апенальтиқәа рысрахь ииасит. Ашьапылампыласыҩцәа хәынтә-хәынтә иасит, урҭ рахьтә ԥшьба-ԥшьба ҭадыршәит, анаҩс даҽа акака ҭадыршәыртә алшара рырҭеит, убасҟан ауп аԥсуаа аԥыжәара анырга. Атурнир зегь аан еиԥш, аԥсуа команда амбахьчаҩ Алексеи Бондаренко оумашәа ибзиан дыхәмарит - ҩ-пенальтик ааникылеит.