АҞӘА, ԥхынгәы 21- Sputnik. Акоронавирус аштамм ҿыц дельта аасҭагьы ишәарҭоу цәырҵыр алшоит ҳәа аҳәамҭа ҟаиҵеит Агәабзиарахьчаразы адунеизегьтә еиҿкаара (ВОЗ) адиректор хада Тедрос Адханом Гебреиесус, Жәларбжьаратәи аолимпиатә еилакы 138-тәи асессиаҿы дықәгыло.
Иара иажәақәа рыла уи адунеи зегьы иалаҵәар ҟалоит.
"Акоронавирус заҟа аҽарҭбаауа аҟара авариантқәагьы ҟалар алшоит, дельта-вариант аасҭагьы ишәарҭаны. Авариантқәа заҟа ирацәоу аҟара иҟоуп ашәарҭара алаҵа хәарҭамкәа аҟалараз", - иҳәеит иара.
Гебреиесус иазгәеиҭеит Агәабзиарахьчаразы адунеизегьтә еиҿкаара COVID-19 аҿагылараз иахықәкы хаданы иамоу - 2022 шықәса цәыббрамзазы тәылацыԥхьаӡа руааԥсыра 70 процент алаҵа рзыҟаҵара шакәу.