АҞӘА, нанҳәа 12 - Sputnik. Аԥшьашеи ахәашеи рзы Краснодартәи атәылаҿацә ауааԥсыра ргәы рҽанырҵоит ақәаршҩы, аӡхыҵрақәа, аԥшатлакә ҟалар алшоит ҳәа, абри атәы аанацҳауеит РИА Новости Урыстәыла аҳауагәаҭыратә центр адыррақәа шьаҭас иҟаҵаны.
"Краснодартәи атәылаҿацә аҿы аҳауатә цәырҵрақәа азгәаҭоуп: ақәаршҩы, адыд-амацәыс, 20-23 метра иҟоу аԥшаӷьы, аӡиасқәа рҿы аӡышьҭыҵра, Амшын еиқәа агәахьы, Анапа – Магри иахьаҵанакуа аԥшатлакә", - аҳәоит адырраҭараҿы.
Урыстәыла аҳауагәаҭыратә центр аҭҵаарадырратә напхгаҩы Роман Вильфанд иҳәеит Амшын еиқәа агәаҿы аҽшеиҿнакааз мезоциклон. Ари атермин иаҵанакуеит еиҳа иаӷьу ациклон.