АҞӘА, цәыббра 20 - Sputnik. Цәыббра 20 рзы Аахыҵ Уаԥстәыла иазгәарҭоит аҳәынҭқарратә ныҳәа – Ареспублика амш. абри атәы аанацҳауеит Sputnik Южная Осетия.
Ареспублика зегьы аҟны имҩаԥысуеит аныҳәатә уснагӡатәқәа. Урҭ ирылахәхарц азы арахь иааиит Урыстәыла, Шьамтәыла, Аԥсны, Донецктәии Лугансктәии жәлар рреспубликақәа рхаҭарнакцәа. Аԥснытәи аделегациа напхгара аиҭоит Адәныҟатәи аусқәа рминистр Даур Ақаҩба.
Традициа ҳасабла ари амш арратә парад ала иазгәарҭоит Цхьынвалтәи агарнизон аруаа. Иара убасгьы Аҳәынҭқарратә драматә театр ахыбраҿы имҩаԥысуеит ауаажәларра рныҳәатә еилатәара, аспорт Ахан "Олимп" аҿы аӡсаразы атурнир мҩаԥгахоит.
Ахәылбыҽха атеатр ашҭаҿы имҩаԥгахоит аконцерт "Уаԥстәыла-ҳаҩны гәакьа". Аныҳәа хыркәшахоит афеиерверкқәа рыла.
Ареспублика амшныҳәа цәыббра 20, 1990 шықәсазы Аахыҵ Уаԥстәыла автономтә статус Аахыҵ Уаԥстәылатәи асовет демократиатә республикаҟынӡа ашьҭыхраз аӡбра анрыдыркылаз амш иадырҳәалоит. Ари ареспублика ахьыԥшымрахь амҩаҿы раԥхьатәи шьаҿан.