Цәыббра 30 рзы Аԥсны иазгәарҭеит Аиааиреи Ахьыԥшымреи рымш. Ашьыжь имҩаԥысит Аԥсны ахада Аслан Бжьаниеи Аахыҵ Уаԥстәыла ахада Анатоли Бибилови реиԥылара. Уаԥстәылатәи аделегациа Аԥсны иаҭааны иҟоуп агәалашәаратә усмҩаԥгатәқәа ирылахәхәаразы.
Аиԥылара ашьҭахь аҩтәылак рхадацәа Аҟәа Ахьӡ-аԥша апарк аҿы ашәҭшьыҵәрақәа шьҭарҵеит, иара убас иаҭааит Аԥсны раԥхьатәи ахада Владислав Арӡынбеи аҩбатәи ахада Сергеи Багаԥшьи рнышәынҭрақәа.
Иара убас Бжьаниеи Бибилови, аиҳабыра рхаҭарнакцәеи, асасцәеи ашәҭшьыҵәрақәа шьҭарҵеит Очамчыра араион Тамшь ақыҭан игылоу аԥсадгьыл ахьчаҩцәа рбаҟа амҵан.
1992-1993 шш. рызтәи Аԥсны Аџьынџьтәылатә еибашьраан игаз Аиааира 28 шықәса ахыҵра иазкны Аҟәа имҩаԥган аруаа ргәырӷьаратә мҩасра.
Арратә оркестр ианарҳәоз амузыка ршьаҿа ақәыршәаны имҩасит 500-ҩык аруаа - Аԥсны Атәылахьчара аминистрра, Аҟәатәи иреиҳаӡоу азеиԥшдҵаҟаҵаратә ҵараиурҭа, урыстәылатәи абыжьбатәи арратә база, Аԥсны иҟоу Урыстәыла Афедералтә шәарҭадаратә маҵзура аҳәаахьчаратә усбарҭа иртәу аруаа.
Цәыббра 30 1993 шықәса рзы Аԥсны Арбџьармчқәа Егры аӡиас иаԥну Қырҭтәылеи ҳареи иҳабжьоу аҳәынҭқарратә ҳәаахь инеины ҳҳәынҭқарратә бираҟ ахадыргылеит, уи алагьы 413 мши ҵхи ицоз аџьынџьтәылатә еибашьра хыркәшан.
Уинахыс Аԥсны Қырҭтәыла амч ахнаҳәеит, ахы иақәиҭхеит, Қырҭтәыла аиурисдикциа азхазымҵо ахатәы напхгара шьақәнаргылеит.