АҞӘА, жьҭаара 22 – Sputnik. Дҭахеит аԥҳәыс-оператор, дхәуп арежиссиор, ҳәа аанацҳауеит РИА Новости апортал TMZ адыррақәа шьаҭас иҟаҵаны.
Ихысыз актер Алек Болдуин иоуп, ҳәа аҳәамҭа ҟаиҵеит аокруг Санта-Фе ашериф.
Иҟоу адырраҭарала ахархәара амазар акәын ахы зҭам апатрона. Афильм арежиссиоргьы дхәуп, иҭагылазаашьа уадаҩуп. 42-шықәса зхыҵуа аԥҳәыс-оператор Галина Хатчинс дыхәны ақалақь Альбукерке ахәышәтәырҭахь днаргеит аха аҳақьымцәа дырзеиқәмырхеит.
"Ашериф иофис ишьақәнарӷәӷәоит ареквизиттә бџьар ала ихысыз Алек Болдуин иоуп", — ҳәа аҳәоит адырраҭараҿы.
Аокруг Санта-Фе Хуан Риос ашериф иофис адыррала Болдуин макьана харак идгалам. Акиносахьа аҭыхра аанкылоуп.
Атапанча ахы зҭаз апатрона ала иахьеиҵази Болдуин дызхысызи амзызқәа шьақәдыргылоит.
Аҭыхрақәа мҩаԥысуан аштат Ниу-Мексико аҿы. Алек Болдуин продиусерс дыҟан, ароль хадагьы неигӡон.
Акинооператор Галина Хатчинс Украинатәуп, Асовет еидгылаҿ илызҳаит. Киевтәи ауниверситет жәларбжьаратәи ажурналистика афакультет далгеит, британиатәи акинодокументалистцәа аус рыцылуан.
Аҵыхәтәантәи аамҭазы Хатчинс Лос-Анджелес дынхон. Аоператорс дрыман акинофильмқәа "Дорогуша" (2019), "Заклятый враг" (2020), Blindfire (2020).